خصص برنامج "راجل و2 ستات" حلقة اليوم للحديث عن سقف التوقعات بين الزوجين وفى الحياة الزوجية، حيث قالت الإعلامية شريهان أبو الحسن: "سقف التوقعات فى الحياة الزوجية أصبح كبيرا لأننا بقينا نقارن نفسنا باللى حولينا".
وأضافت، خلال برنامجها راجل و2 ستات المذاع على قناة on: "المشكلة فى ارتفاع سقف التوقعات بين الزوجين سببها السوشيال ميديا.. وخلقت عندنا مجالات كثيرة للتنافس.. وفى الجواز لازم الست تتوقع سقف للحياة مع شريك حياتها.. ولازم ترسم سقف أحلامها فى أنها تكون سعيدة مع رجل وفى ومخلص ورومانسى على سبيل المثال وهكذا".
وتابعت شريهان أبو الحسن: "الست لما تتجوز يبقى لازم يكون عندها حياة مختلفة.. وتبقى الست فيها سعيدة ومستقلة".
ومن جانبها، علقت الفنانة هيدى كرم على سقف التوقعات بين الزوجين قائلة: "ليه إحنا بقى سقف توقعتنا عالى قوى.. وكلنا دايما متوقعين أن الجواز هيدينا كل حاجة.. والحياة الزوجية هتحقق لنا كل أحلامنا.. وسعدتنا مترتبة لبعد الجواز.. ولدينا سقف توقعات فى كل حاجة فى الحياة مش بس الجواز فقط".
وتابعت: "السوشيال ميديا خلى الحياة الاجتماعية مش بسيطة زى زمان.. وهناك حاجات إلزامية فى الزواج وهى الالتزام تجاه العلاقة، وتحمل المسئولية، والكلام اللطيف والمودة، الاحترام المتبادل، ومن حق السيدة أخذ وقت من حياة الراجل لنفسها بعيدا عن عمله، وكذلك الاهتمام والدعم والتشجيع والمشاركة".
