رسالة بالدموع إلى دنيا وإيمى سمير غانم.. هو خلاص كدة نصيبى من حضن بابا وماما خلص؟ زحمة الناس كدابة.. عنيا بتلقط مشاهد بكادرات مخرج محترف.. في الآخر كله بيمشى.. وبتفضل لوحدك متحاصر بجبال الذكريات الحلوة

لحظات عصيبة مرت على أسرة الفنان الراحل سمير غانم خلال الأربعة شهور الأخيرة، بداية من وفاته وإصابة زوجته الفنانة دلال عبدالعزيز بفيروس كورونا، وعدم تمكنها من حضور جنازته وتشييعه لمثواه الأخير.

ربما يطرح البعض تساؤلًا هامًا، ترى بماذا تشعران ابنتيهما دنيا وإيمى بعد هذا الاختبار الصعب؟ فقدان أحد أضلع الأسرة أمر مهيب، فكيف تكون مشاعر وحزن فقدان الأب والأم خلال 4 أشهر؟

أسرة سمير غانم

بث"تليفزيون اليوم السابع"، رسالة خاصة من فتاة مرت بتجربة مشابهة، فشعرت بنفس المشاعر، ومرت نفس لقطات الجنازات أمام عينيها، الرسالة من كتابة وإعداد إسراء عبد القادر، وإداء صوتى حور محمد، ومونتاج محمد أشرف.

وجاءت نص الرسالة كالتالى:

في 3 شهور بس دنيا وإيمى فقدوا الأب والأم

الكل بيتعاطف وبيواسى وبيدعيلهم بالصبر

بس اللى شايلاه قلوبهم تقيل أوى..

سمير ودلال

**

الرسالة دى من بنت مرت بنفس التجربة..

تقدر تقول إنى جايالكوا من المستقبل..

هتحسوا بإيه الفترة الجاية؟..هو إيه أصلا اللى حصل؟..

هو أنا مش هشوفهم تانى؟..يعنى خلاص كدة؟..طب والحاجات اللى لسة عايزين نعيشها؟..

حكايتنا..وحواديتنا..والنكش طول اليوم..

هدلع على مين أنا دلوقتى؟

كان لسة والله في حكايات كتير عايزين نعيشها..

هو خلاص كدة نصيبى من حضن ماما خلص في الدنيا؟

دعواتك كنت ماشية بيها والله..

يا ماما..هعمل إيه في عيد الأم طيب؟..هيعدى عليا إزاى؟

طب يوم ميلادك وانا بنكشك وبقولك..ها عايزة هدية إيه السنادى يا ست الكل؟

كل ما بتنجح بتجرى تدور على أهلك عشان تفرحهم..طب دلوقتى إيه الحل؟

**

دلال وإيمى

دنيا وإيمى

دنيا وإيمى..الفترة دى صعبة..زحمة الناس "كدابة"

وكل كلمات المواساة..زيها زى  كلمة معلش..

المشهد دلوقتى.."مسرحية"..وكل واحد بيأدى دوره  على خشبة المسرح على أكمل وجه.

بس أنا في الكواليس.."مع إنى البطل"..

عنيا بتلقط مشاهد..بكادرات مخرج محترف..

عقلى بيسجل..بس قلبى تايه..

**

شكرا لدعوات كل اللى بيحبونا وألف شكر للسند والوجود..

بس في الآخر كله بيمشى..وبتفضل لوحدك متحاصر بجبال الذكريات الحلوة..وشريط حياة بالكامل بيعدى قصاد عنيك..

هنا ضحكنا..وهنا بابا زعقلى..وهنا حضنى وعيونه كلها فرحة وفخر بنجاحى..

هنا عنفنى لما غلطت..وهنا شوفت فيه أحسن راجل في الدنيا ممكن أقابله.

**

ربنا يصبرك قلوبكم؟..

ياااه..ياريت والله..ياريت ربنا يرزقنا الصبر..ويملا قلوبنا سكينة بعد الفقد دة

**

الناس هيقولولكوا الوقت بينسى..بس دى طلعت أكبر كدبة..

الوقت مع الفراق بيمشى عكس عقارب الساعة

مابيطفيش الذكرى..ولا بينسى ..بالعكس..دة بيركز على تفاصيل بتوجع أكتر..

الوقت بعد الفراق كل ما بيطول..كل ما بيبقى أصعب..

كل ما بيظهر تفاصيل مكانتش واضحة وقت الصدمة..

بتلاقى نفسك بدل ما كنت ماشى في إيد صحابك..فجأة بقيت بطولك..

أو روحك بقت ناقصة حتة بمعنى أصح..

**

الدنيا هتقف؟

لا هتمشى..بس هتمشى شكلها إيه؟..وبأى روح؟..وبأى طاقة؟

هتعافر وتقدر؟؟

هتحاول..وهتقدر أوقات..وأوقات هترجع لقبل نقطة الصفر..

عارف أم كلثوم وهى بتقول "بعد ما صدقت إنى قدرت أنسى..جم بهمسة وفكرونى؟..أهو دة بالظبط اللى بيحصل بعد فراق حبايبنا..

بتلهى نفسك في تفاصيل اليوم..بتشيل مسئوليات أزيد..

بس على مين..القلب مربوط  بحبل من رقبته بالذكريات..مهما تبعد هيرجعك..

**

دنيا وإيمى عارفة إن الموقف دلوقتى صعب..بس متخافوش ..الأب والأم لما بيبقوا كلهم حنية..بتبقى ذكريات بعد الفراق زى نسمة الهوا اللى بتعدى عالقلب في عز  الحر..

هتعيش قافل على قلبك كم ذكريات وامتنان لأهلك اللى فارقوك..مابقاش في إيديك غير الدعاء..هو دة اللى هيوصل..دعاء ورحمات وشكر على كل لحظة تضحية عملوها عشانك.

عقلك  هيتحول لصندوق ذكريات كبير..كل فترة تفتح تبص وتاخد نفسك من زحمة الأيام..هتحس إنها زى الرحلة..فسحة كدة بتاخد فيها نفسك..بس للأسف بعدها تزعل.. تزعل على حبايب مش هتشوفهم تانى..وعلى حتة منك سافرت خلاص.

**

بس أقولكم؟ في الآخر..أهلنا كانوا طيبين..شوفنا في حياتهم كل الهنا.. سابولنا سيرة من أعظم ما يكون..مشوار ورحلة مليانة خير..

السيرة الطيبة مسئولية..يارب نقدر نشيلها..ونكمل عليها

**

دنيا وإيمى..الفراق صعب..بس هتقدروا عليه بحضن بعض..ووجودكم كتف بكتف الفترة الجاية..دلال وسمورة أدوا رسالتهم على أكمل وجه..وعملوا أجمل أسرة فنية كلنا بنحبها..سمورة ودلال..شكرًا على اللحظات السعيدة..هتوحشونا..ونشوفكم على خير..