مرت على دول كثيرة بدموع ولهفة اشتياق لإنجاب طفل، باءت كل محاولاتها بالفشل فكانت تحمل وتلد ثم يشاء القدر أن يتوفى كل رضيع بعيوب خلقية حتى وصل عددهم إلى 12 طفل مدفونين في دول متعددة أوروبية واسيوية وعربية، تحدثت عن ألمها حتى هداها الله "عز وجل" إلى زيارة "أم الدنيا مصر" لتحقيق حلمها في الإنجاب.
"هيشو عزيز"، فتاة كردية من السليمانية بالعراق، عاشقة لمصر بكل تفاصيلها، لا تمر سنة إلا وتنزل لزيارة مصر والتجوال في مناطقها الشعبية التي تحبها وتعشق ناسها الطيبين البسطاء، هذا ما حدث لـ"هيشو" التي تحقق حلمها في مصر بإنجاب ابنتها "جازان" والتي تبلغ من العمر 4 أعوام، وفى حلقة جديدة من برنامج "فتحى شو"، تقديم محمد فتحى عبد الغفار، كشفنا تفاصيل أكثر عاشقة لمصر فى العالم وسر حبها لمصر بعد أكلة "سمين" جبارة ووفول وطعمية على عربية الفول .
وتقول "هيشو"، "انا جيت مصر بعد ما لفيت دول كتيرجدا في العالم ومتقدمة طبيا وربنا محققش حلمى الا لما جيت مصر، مصر هي الأمل والحب بالنسبة لى، بحب ناسها وأهلها الطيبين، بنتى فيها روح مصر لانها مولودة بأم الدنيا وانا فخورة بده، علشان كده بجيبها كل سنة تشوف مصر لأنها مصرية حتى لو مش معاها الجنسية المصرية".
وتابعت، "انا بعمل حلاقة للسيدات الكرديات وغيرهم، الأكراد من عادتهم انهم بيهتموا ببشرتهم وشعرهم كويس جدا، وسر جمال الشعر هو العناية بيه من خلال الداخل والخارج وليس خارجيا فقط من الداخل بنصح أن السيدات يأكلوا الافوكادو والفواكه ويشربوا مياه كتيرة ويستخدموا زيت النخاع اللى موجود داخل عظام البهائم".
واستكملت، "عندنا محدش بيستخدم سكر في الحلويات لأننا بنستخدم المن اللى بينزل من السما على شكل امطار بتنزل على أوراق الشجر وديه احنا بناخدها وطعمها مسكر وبنعمل منها كل أنواع الحلويات من غير إضافة سكر وده اللى بنقول عليه في القران الكريم المن والسلوى وده بينزل عندنا دلوقتى بقاله حوالى 80 سنة وكل اللى بيجى السليمانية بياخد حلويات معاه وهو مروح".
وأوضحت، "انا مهتمة بالعناية بالبشرة والشعر والسمنة والنحافة وعندى محل كوافيرة، كل السيدات الاكراد بتشتغل محدش بيقعد في البيت كلهم شغالين وبيحتاجوا عناية بشعرهم وبشرتهم انا واخواتى البنات الأربعة بنعمل في نفس المهنة".
