"مميزة مش مختلفة" هى الجملة التى تقولها الطفلة رحمة البدراوى دائما على نفسها فلم تكن طفلة عادية مثل باقى الأطفال ولكنها تميزت بمواهبها المتعددة وروحها الجميلة، استطاعت بأصابع يديها غير المكتملة أن تكون عازفة لآلة إكسليفون واتقنت الرسم بقدميها دون تدخل أو تدريب من أحد، فضلا عن بطولتها فى السباحة وحصولها على لقب سفيرة الإصرار بالمجلس القومى للأمومة والطفولة.
تفقم الأطراف هى المتلازمة النادرة التى تعانى منها الطفلة رحمة البدراوى التى تبلغ من العمر 11 عاما، كان يوم ولادتها بمثابة مفاجئة كبيرة لأسرتها ولكن كان بداخلهم إيمان قوى بأنها ستصبح طفلة مميزة وقوية وإنها هدية من عند ربنا، ومنذ الأيام الأولى من عمرها تولت مسئوليتها عمتها زينب البدراوى أخصائية التخاطب.
وقالت زينب البدراوى لـ اليوم السابع" رحمة هدية من ربنا وهدية حلوة كمان من أول يوم ولادتها وانا متأكدة إنها هتبقى حاجة كبيرة أوى وفعلا هى كل يوم بتبهرنى عن اليوم اللى قبله، وهى سنتين ونص اختها زينة قالتلى ايه رايك نخليها تلعب سباحة، كنت مستغربة الأول هل ده ينفع لان رحمة تعانى من تفقم الأطراف لكن قررنا نجرب، وروحنا النادى بالفعل وكانوا المدربين مستغربين الوضع جدا لكن مع الوقت الحمد لله رحمة اتعلمت وكانت مميزة والحمد لله حصلت على جوائز كتير فى السباحة وميداليات برونز وذهب.
وتابعت، انتقلنا لمرحة تانية فى حياتها وهى عزف إكسليفون فقلنا نجرب أكيد هتتعلم وتعرف تعمل ده وفعلا اتعلمته وشاركت فى عروض واحتفالات، فضلا عن ذلك حبها للرسم وده كان غير متوقع لأن الرسم أكيد محتاج أطرف تمسك القلم وتقدر تتحكم فيه لكنها كانت بتشوف اختها بترسم ازاى وتعمل زيها وبقت بترسم بقدميها ورسمت لوح وشاركت بيهم فى معارض وواحدة من لوحاتها اتباعت فى أمريكا.
واستطردت حديثها قائلا" انا فخورة جدا برحمة وبالى وصلت ليه هى الحمد لله قدرت تحقق اللى متخيلنهوش أصلا ومؤخرا حصلت على لقب سفيرة الإصرار بالمجلس القومى للأمومة والطفولة وبتمثل فى مسلسل القضية 404 وهو أول مسلسل أبطاله من ذوى الهمم.
وأنهت حديثها قائلة" رحمة عاملة زى الفراشة وزى ما الفراشة متعددة فى ألوانها رحمة متعددة المواهب بتمثل وبتغنى وبترسم وبتعزف وبطلة سباحة، بتعمل حجات كتير حلوة وانا معاها لأخر الطريق".
تم أضافة تعليقك سوف يظهر بعد المراجعة