عقبت فاتن الحلو مدربة الوحوش المعروفة ومالكة السيرك المصرى الأوروبى على جدل السوشيال ميديا بسبب صورة أسد يظهر فى صورة وكأنه نائم مما دفع رواد التواصل الاجتماعى لاتهامها بإرهاق الأسد قائلة : " الأسد فى الصورة المنشورة لم يكن حزين، لكن غمض عين، وده حاجة اسمها "تريك" وهو كان مبسوط والسوشيال ميديا مش أول مرة تهاجمنى وقبل كدة قالوا أن فيه أسد مات وده مش حقيقى”.
وأضافت الحلو فى مداخلة هاتفية خلال برنامج " كلمة أخيرة " الذى تقدمه الإعلامية لميس الحديدى على شاشة ON أن الأسد اسمه " كوبر" وليس "سكر" قائلة : " اسمه كوبر مش سكر والحيوانات زى أولادى بالضبط وبحافظ عليهم وبعت كل حاجة عندى لأجل عيون الأسود."
واتهمت فاتن الحلو من أسمتهم بالمنافسين بتسريب الصورة قائلة: ": المنافسين عايزينى أقفل وربنا واقف معايا لأنى مبأذيش حد، والسيرك لقمة عيشنا ومصممينه على أعلى مستوى وعندنا عمال بتاكل عيش، طب لية عايزينا نقفل، مشيرة إلى أن ثمن الأسود غالى جدا قائلة : " أسعار الأسود غالية تصل لـ150 ألف و200 ألف والنمور غالية جدًا والأسود بتاكل لحمة كتير، وكل أسد بياكل من 20 لـ 30 كيلو لحمة فى اليوم وبقدم للأسود اللى عندى لـ100 كيلو".
