حكت الإعلامية لبنى عسل خلال حلقة اليوم من برنامج الحياة اليوم المذاع على قناة الحياة ما دار فى اللقاء الأخير بنها وبين الإعلامى وائل الإبراشى أثناء علاجه بالمستشفى قبل وفاته متأثرًا بفيروس كورونا.
وقالت: "كان إنسان وصديق وعشرة عمر على المستوى الإنسانى، يمكن أنا شوفته واتكلمت معاه فى الوقت اللى كان فى المستشفى فى الفترة الطويلة اللى كان فيها هناك، ووالدى الله يرحمه فى الفترة دى كان موجود هناك ولما عرفت أن وائل كان فى نفس الدور طلبت أنى أطمن عليه وقتها قالولى إنه مش عايز يشوف حد ومش عايز يكلم حد وكان مدايق من الإشاعات والأخبار، لأنه كان كل شوية خبر يطلع بوفاته، موضحة أنه كان من الصعب عليه وهو بيتعالج وبين أيدين ربنا فى وقت قاسى يسمع خبر وفاته وهو فى المستشفى على السرير، ودخلوا له وكنت واقفة برة على باب غرفته وسمعته وهو بيقول إنه مش عايز يشوف حد ولما عرف إنى لبنى قالهم خليها تدخل، وقتها كان نفسى ادخل لأنه كان نفسه حد يقف جنبه وأننا نقف جنب بعض".
وتابعت: كان بطل ومقاتل بكل معنى الكلمة، يعنى الوضع كان صعب أوى بجهاز تنفس والرئة تكاد تكون اتدمرت تمامًا لأن نسبة التليف فيها كانت عالية جدًا، وكان فاتح التليفزيون وبيفترج على البرامج قولتله ريح دماغك من المشاكل والأخبار وقالى هشوف وهرجع واشوف الأخبار، وكان مصر على الكلام، مشيرة إلى أنها قالت له تحب أقول للناس أى حاجة قالى لأ لا عايز حد يتكلم عنى ولا حد يقول أخبار عنى، ربنا يرحمه يارب، التوقيت كان صعب وهو عانى اتدمرت تمامًا والابتلاء والمرض بيبقى كفارة، الله يرحمه.
