الرئيس السيسي: "نقدم التحية للقطاع الخاص على مبادرة زيادة الأجور"
الرئيس السيسي للمستثمرين: "بنفتح الباب على آخره ويهمنا البلد تطلع لقدام"
الرئيس السيسي لمستثمرى ابدأ: "مستعد أشارك معاكم بالنص علشان أشجعك"
قدم الرئيس عبد الفتاح السيسي، التحية إلى القطاع الخاص على مبادرة زيادة الأجور، وفق القرارات التي أصدرتها الحكومة مؤخرا بمبلغ 300 جنيه، قائلا: "مع القطاع الخاص بيكون فيه تشاور مع بعضنا خاصة أن كل منشأة لها ظروفها.. أنتم لكم تصور".
ورد المهندس محمد زكي السويدي، رئيس اتحاد الصناعات المصرية على حديث الرئيس السيسي حول قيمة الزيادة خلال افتتاح الملتقي والمعرض الدولي الأول للصناعة، قائلا: "كل منشأة حسب ظروفها.. العمالة كثيرة.. وأغلب القطاعات هي زودت سواء 300 جنيه أو الحد الأدني للأجور أو زيادة على باقي المرتبات.. والقطاع الخاص يشعر بالأوضاع"، ليرد عليه الرئيس السيسي: "بنحيكم على الزيادة".
وجه الرئيس عبدالفتاح السيسي، ببذل كل الجهود بهدف إزالة العوائق أمام المستثمرين، قائلا: "الرخصة الذهبية لكل من يتقدم 3 شهور ونبذل جهد شوية مع المستثمرين ونراجع، لو الأمور مشيت كويس ولقينا حجم الإنجاز مشجع نقدر نفكر نكمل 3 شهور تانية.
أضاف الرئيس السيسي خلال إطلاق الملتقى والمعرض الدولى الأول للصناعة: "بنشتغل عمل مؤسسى والتجارة والصناعة موجودة وهندي الرخصة دي لكل المتقدمين لمدة 3 شروط، وإحنا بنتحرك كده وبنفتح الباب على أخره وآليات العمل والحوكمة مش زى ما إحنا عاوزين في مصر، والسبب اتكلمنا وقلنا في المؤتمر الاقتصادي مش عاوزينكم تعانوا منه، وكلنا مع بعض ويهمنا البلد تطلع لقدام".
وجه الرئيس عبدالفتاح السيسي بمنح الرخصة الذهبية لكل المستثمرين الذين تقدموا للحصول عليها وذلك لمدة 3 أشهر.
قال الرئيس عبدالفتاح السيسي، إن هناك الكثير من الأنشطة تحتاج إلى دراسات، معلقا بالقول: "فيه أنشطة بتتعمل محتاجة دراسات لكن فيه حاجات واضحة جدا زى الخامات الدوائية والمعدات اللى بنستوردها، حياة كريمة هيتصرف عليها تريليون جنيه، وتحتاج طلمبات وهتحتاج صيانة وما حدش هايبقا قلقان إن المنتج بتاعه هيتعرض لحاجة، وتساءل: لو فيه مشكلة لحد مش هنقف جنبك ولا إيه؟.
أضاف الرئيس السيسي، خلال إطلاق الملتقى والمعرض الدولى الأول للصناعة:"الـ 100 مليار دولار بتاع التصدير بعد كام سنة هايبقا الحلم بعيد قوى.. بقالي 7 سنين في الشغلانة دي، وعارف إن المواضيع دي بتأخر وبتضيع علينا فرصة.
وأبدي الرئيس السيسي استعداد الدولة للدخول كشريك مع بعض المستثمرين في مبادرة ابدأ بهدف تشجيع رجال الصناعة، قائلا: "يا اللي هتشتغلوا في ابدأ مستعد أخش معاكم بالنص، مش علشان عاوز أخش معاك، لكن علشان أشجعك إن فيه جزء من المخاطرة الدولة معاك فيها، والهدف أيضا تشجيع رجال الصناعة في مصر، وكل من يحتاج يتحرك معانا إحنا معاك".
أكد الرئيس عبد الفتاح السيسي، أن الأوضاع الحالية لتطوير الصناعات المختلفة تحتاج إلى إجراءات غير تقليدية، قائلا: "لما اتكلمت عن الرخصة الذهبية قولت خليها 3 شهور.. افتح الإجراءات لمدة زمنية محددة.. واقبل التجاوز والعوار فيها مؤقتا.. واظبط الدنيا تاني.. بس دي قوة دفع هائلة لمشاريع بتاخد وقت كبير جدا .. في فترة زمنية .. حتى لو فيها شيء في العوار".
وأضاف الرئيس السيسي، خلال كلمته في افتتاح المعرض والملتقي الدولي الأول للصناعة: "البنك يقول للمستثمر طالب التمويل عاوز دراسة الجدوي.. علشان يقدر يمول المشروعات.. والبنك بيطلب طلبات محددة.. المصري هحلها دلوقتي فيما يخص دراسات الجدوي.. فيه قوائم لمشروعات محددة أقرتها التجارة والمالية والبنك المركزي... وبنقول للبنوك المشروعات دي لو سمحت يتم العمل معاها مستعدين نتحمل.. وفق المسار ده لما واعمل 100 مشروع بالطريقة دي.. بطريقة دراسات الجدوي هتاخد 5 سنين .. وتضيع الفرصة 5 سنين.. يمكن بالطريقة دي ياخدوا سنة.. يمكن يكون جواهم 2 أو 3 مش مظبوطين.. مستعد كدولة ادخل لتجاوز موضوع الوقت والخوف لمن يرغب.. علشان نقدر نحقق اللى بتتمناه.. وشكرا جزيلا".
تحدث الرئيس عبد الفتاح السيسي، عن طموحات العمل في القطاع الصناعي، قائلا: "قولت قبل ما أجي النهارده.. اعمل أنا مكتب لإدارة المشروعات الصناعية الجديدة.. واقعد على الحاجة لحد ما تخلص.. وأفضل أقول اعمل اعمل اعمل اعمل.. أقل خسارة وأقل خطورة من أني مش اعمل عقبال ما أدرس وأشوف.. بقول الكلام ده لينا كلنا.. للتجارة والصناعة.
وأضاف الرئيس السيسي، خلال كلمته في افتتاح المتلقي الدولي الأول للصناعة: "بنتكلم عن معايير مؤسسية لإدارة العمل.. وقد تكون أحيانا معيقة للتقدم.. وحجم الضرر الناتج عنها.. قبل ما اجي قولت اعمل عندي مكتب.. واللى عنده مشروع بـ 100 مليون يجيلي على طول.. والدكتور مصطفي عمل كده.. ومش معناها أن الناس مش شغالة".
أكد الرئيس عبد الفتاح السيسي، أن الواقع الذى حدث خلال الثلاث سنوات الماضية يتصور البعض أنها أبرزت تحديات وأزمات ولكنها أظهرت لنا فرص نحتاج الاستفادة منها، قائلا: "لما حصل موضوع الصراع التجارى فى العالم بينت أن في تحول كبير حتى في أثناء جائحة كورونا ثم الأزمة الروسية الأوكرانية".
وأضاف الرئيس السيسى، خلال تعليق بافتتاح الملتقى الدولي الأول للصناعة، أن ما يحدث الآن في العالم يشير إلى أن حركة التجارة يعاد تشكيلها وصياغتها، وأن مصر لديها فرصة كمصنع بما تقدمه من تكلفة الإنتاج والتشغيل، متابعا: "أنا عارف السوق العالمي فيه إيه وحتى في مصر اقدر أعمل إيه، ولما أقول للناس تعالوا في تطوير للإنتاج من خلال اتفاقيات وتسعير الطاقة عندنا والتسهيلات والعمالة المصرية اللي تكلفتها لا تقارن بأي تكلفة ثانية".
ووجه الرئيس السيسي كلامه لرجال الأعمال والمستثمرين: "لكم كل الدعم من الحكومة والشعب ومن بعضنا من أجل بلدنا وتواصلنا المستمر هيخلينا نشوف أكتر، وأننا نسمع بعض دون اتهامات تعالوا نسمع بعض، وتعالوا نتحرك لمصلحة مصر المشتركة ولسه بدرى وعندنا فرصة كويسة".
