كشف محمد علاء بائع الخبز الذي ناقشه الرئيس السيسى في سعر الخبز خلال جولته بمنطقة مصر القديمة، عن الحوار الذي دار بينه وبين الرئيس عبد الفتاح السيسي.
وقال محمد إنه كان يجلس بجوار طاولته لبيع الخبز وفوجىء بوقوف سيارة الرئيس أمام ليسأله عن سعر الخبز، مستطرداً:" لقيت الريس بيندهلى وأنا والله ما أعرف مين اللى معدي، وقالى بتبيع العيش بكام، قولتله حضرتك أنا ببيع الرغيف بنص جنيه، وإن صاحب المكان هو اللى محدد سعر الرغيب بـ50 قرشا".
وأضاف محمد، خلال لايف خاص على اليوم السابع: "أنا مكنتش مصدق إن الريس بيكلمني أنا، بصراحة شخصية شبهنا بيتكلم معايا كأنى بكلم والدى أو عمي حد قريب منا، كأنه والد بيكلم ابنه، وبيكلمنا بكل ذوق واحترام"، موصحاً أنه ليس له علاقة بأى أسعار خارجية وأن الأسعار التي يقوم به هي من تعليمات صاحب المخبز.
وكان أجرى الرئيس عبد الفتاح السيسي، جولة تفقدية في منطقة مصر القديمة والقاهرة التاريخية، لمتابعة سير العمل بعدد من المشروعات القومية بالأمس.
وتوقف الرئيس السيسي للحديث مع صاحب أحد الأفران، وسأله عن سعر الرغيف الحر "بتبيعه بكام بصراحة؟"، ليرد صاحب الفرن: "والله بنص جنيه الرغيف"، فرد الرئيس: "يبقي أقل من تمنه.. يعني أنت بتبيع الحاجة بأقل من تمنها؟.. إذا كان هو بيتكلف 65 قرشا، بتبيعه أنت بـ 50 قرشا؟!".
وتابع الرئيس السيسي: "رغيف العيش الحر بدقيقه.. بالخميرة.. بالعامل اللى بيشتغل.. بشوية الكهرباء ولا الغاز.. والايجار بيتكلف 65 قرشا.. ولو انت هتبيعه بـ 65 قرشا هقول ماشي بتمنه.. ولو بتبيعه بـ 80 قرشا هقولك بتكسب 15 قرشا.. وأنت بتعمل كام ألف رغيف في اليوم؟.. ليرد عليه العامل: "يعني حوالي 15 ألفا".. ليواصل الرئيس السيسي حديثه مع عامل الفرن قائلا: "يا محمد.. أنت بتبيع بـ 50 قرشا.. وبتبيع بشلن".
وتوقف الرئيس السيسي للحديث مع صاحب أحد الأفران، عن سبب غلاء العيش الحر ليرد شاب من الواقفين: "بسبب الارتفاع العالمي عمومًا"، وهنا تدخل الرئيس السيسي قائلا: "أنت مالك بالعالمي.. هو إحنا زودناه عليكم الدقيق؟.. إحنا مش بندي الدقيق من وزارة التموين بالحصص سواء كانت للخبز المدعم أو غير المدعم؟.. الدقيق الحر أنت بتاخده بتمن علشان تفضل تحافظ على ثمن سعر الرغيف الحر.. أكبر دورة ربح هي الدورة اليومية.. أنا كل يوم بعمل رغيف بكسب.. لو بكسب في الرغيف قرش.. يعنى هكسب في اليوم القرش ده.. مش زي السلع والبضائع التانية بتقعد أسبوع أو بالشهر".
وقال الرئيس السيسي: "الخبز مختلف كل يوم الناس بتاخده.. يعني انا لو بكسب في الرغيف ريال "20 قرشا".. وأنا بعمل كل يوم 10 آلاف رغيف.. يبقي مكسبي في اليوم 4 آلاف جنيه يوميا ومحسوب فيهم كل دورة التشغيل.. مرتبات الناس والغاز.. اى حاجة متسعرة فيها 65 قرش.. لو أنت بعيته بـ 85 قرش يعنى أنت خدت 20 قرش مكسبيعنى عملت 4 ألاف جنيه في اليوم.. يعني في الشهر 120 ألف جنيه.. هل ده رقم قليل لمخبز واحد بيعمل 10 آلاف رغيف فقط في اليوم؟.. أنا مش بتكلم في رحمة ومش رحمة.. أنا بقول أي واحد عنده محل أو مصنع عايز يكسب منه، وانا معاه عايزه يكسب ويعيش إنما بالعقل".
تم أضافة تعليقك سوف يظهر بعد المراجعة