حلت الاذاعية هالة رستم ضيفة في برنامج "معكم" للإعلامية منى الشاذلى المذاع على قناة Cbc، وتحدثت خلال الحلقة عن خوضها تجربة فيديوهات "تيك توك" وتخطيها أزمة مرضها، قائلة: "كنت داخل اتفرج على فيديوهات التيك توك وقلت ده مش يناسبنى خالص لان المادة المقدمة وسن الجمهور لا يناسب اختصاصى".
وتابعت هالة رستم: "كنت قاعدة في الاستديو وكانت ذكرى ميلاد أم كلثوم وقلت لواحدة صديقة تعالى نعمل فيديو للذكرى، ومتأكدة أن محدش هيشوفه ولا يتابعنى خالص، وبعد ما قضيت يومى في البيت وقبل ما انام فتحت لقيت ان في تعليقات وناس شافت الفيديو كتير وعاجبهم وناس متابعة وعجبهم كواليس مذيع الراديو بيتكلم ازاى وقاعد ازاى".
وأضافت هالة رستم: "بقيت حريصة على انى أعمل فيديوهات علطول وبقيت البس لبس مختلف مش زى الأول واعمل لوك في كل مرة، وبقيت بفكر اشوف اتجاهاتهم ايه".
وعن بدايتها قالت هالة رستم: " كان وقتها خالى حلمى البلك رئيس الإذاعة وجدتى قالتله مش بتعين حد من عندنا ليه وقالتله على اسمى واشتغلت في البداية محررة اخبار في الإذاعة، ولما قرروا يفتحوا إذاعة الأغانى كنت أول صوت يفتتحها".
وعن التيك تيوك قالت هالة رستم: "فرق معايا في حاجات كتير، وهو ان بقيت معروفة شكلا مش صوت بس، وبقى في تواصل مع الناس وبقيت بتابع هما بيحبوا ايه وأعمله بس بحدودى طبعا".
وعن أزمة مرضها قالت هالة رستم: "كان مرض نادر جالى سرطان بس نوع نادر وهو بيكون ورم التهابى مش بيظهر في الأشعة وعملت تحاليل ورنين وعرفت، وعمرى ما تخيلت أن ده يحصلى ومكنتش عاملة حسابى ان الحياة كده خلاص هتنتهى دلوقتى".
وتابعت: "حاولوا في الشغل يخففوا عنى وقت مرضى في الشيفتات، ومش عارفة ازاى ربنا ادانى قوة انى احط فكرة المرض ده في الخلفية وتوكلت على الله وقلت هتعالج واواجهه بكل صبر وايمان، وبقيت اشتغل أكتر عشان اشتت تفكيرى، وأغير استايل لبسى وحياتى الاجتماعية ونظرتى للحياة كلها".
وأضافت: "أنا مش زعلانة من الاختبار ده بالعكس كان من أجمل الحاجات اللى حصلتلى ان ربنا اختبرنى الاختبار ده، وكنت لسه بكون واخدة جرعة كيماوى واتصل على اختى اقولها يلا نروح نتمشى في المول، واعمل كل حاجة في حياتى زى قبل كده وأكتر، ونصيحتى لأى حد اوعى تفكر في الحاجات السلبية وبص لنصف الكوم المليان".
