ننشر نص تحقيقات تعدي شخص على موظف أمن كومباوند المقطم

حصلت اليوم السابع على نص التحقيقات في واقعة تعدى شخص على موظف أمن بكومبوند، في منطقة المقطم، حالَ مباشرته العمل كفَرْد أمنٍ على بوابة المجمع السكنيِّ، استوقف سيارةً يستقلها أربعة أشخاص طلبوا الدخول إلى المجمع السكني، فاستعلم عن سبب دخولهم، فقرروا دخولَهَم لأحد العملاء لإصلاح سيارته دون وقوفهم على اسمه، فطلب منهم الاتصال به، فتحدث المتهم إليه هاتفيًّا وأمره بإدخال المذكورين فسمح لهم، ثم فُوجئ بحضور المتهم لاحقًا معهم إذ نهره لاستيقافهم، وتعدى عليه بالضرب وبالسبّ، وأحدث إصابات به والى نص التحقيقات.

س/ اسمك وسنك؟

ج/ محمد مصطفى كامل نوار ، 31 سنة، أعمل فرد أمن بشركة للخدمات الأمنية، ومقيم فى قرية نديبه بمركز دمنهور البحيرة.

س/ ما معلوماتك بشأن الواقعة محل التحقيق؟

ج/ اللى حصل وانا فى شغلى كفرد أمن فى الفترة المسائية فى الكمبوند، لاقيت عربية سوزكي بيضا "الثمانية" وبداخلها 4 أشخاص 3 شباب والسائق وراجل كبير، وبحكم عملي وقفتهم علي البوابة رقم ٥ بالكمباوند، وسألتهم انتوا داخلين لمين وهاتدخلوا تعملوا ايه، فردوا عليا وقالولى (ملكش فيه)، فرديت عليهم بعد إذنكم كلموا الساكن يعرفكوا العمارة كام والشقة كام، قام الراجل الكبير اللى كان سايق اتصل على التليفون وكلم الساكن وقاله يا باشا فرد الامن مش عاوز يدخلنا وعاوز يعرف احنا داخلين ليه جوه وهنعمل ايه، بعد كده الراجل الكبير ادانى التليفون وقالي رد على الساكن، فأخدت منه التليفون وبرد على الساكن لاقيته بيقولي يابنى انا ( و . ع) وقالى على مكان سكنه وقالى هما داخلين يصلحه العطل اللى عندى فى العربية، ودخلهم يلا بعد كده قفلت معاه واخدت منهم الرخصة وسجلتها فى دفتر الاحوال وبعد ما سجلتها دخلت الاربع اشخاص الكمباوند.

وبعدها بربع ساعه لاقيت الساكن جه ومعاه الاربع أشخاص دول، وقالى انت فرد الامن اللى على بوابة 5 ، قولتله ايوه ولاقيته بيبلطج عليا وبيعتدى عليا بالضرب بأيده على وشي ورقبتي وسحلنى على الأرض وجرنى على الارض وضرب فيا بأيده وبرجله، فقولتله انت بتضربنى ليه قالى انت بتشتمني ومش عاوز تدخل الناس اللى جاينلي قولتله محصلش والله انا مشتمتكش والناس اللى كانوا داخلين لحضرتك مقالوليش هما داخلين لمين، ولاقيته بيقولي اتصل بمدير الأمن ولما مدير الامن الاستاذ ايمن جه كان أستاذ ياسر حسن اللى ساكن فى الكومباوند داخل على البوابة ونزل من عربيته وقالى ايه يا محمد ايه اللى حصل، فقولتله انى الساكن (و . ع)  تعدى عليا بالضرب علشان وقفت 4 أشخاص كانوا داخلين له، الاستاذ ياسر راح اتكلم مع الساكن (و . ع) بكل احترام بس الساكن شد معاه فى الكلام، والاستاذ ياسر قال للساكن انت مش من حقك تضرب فرد الامن، فقاله انا براحتي وقعد يزعق وقعد يقول انى انا شتمته، فرد عليه الاستاذ ياسر وقاله فى إدارة شركة الأمن وادارة الكمباوند تشتكي له فيها، وبعدين جيه الساكن وكمل فيا ضرب بأيده على وشي، والاستاذ ياسر حاشه عنى وفضل يشتم فيا لحد ما مشي هو والاربع اشخاص مع الاستاذ ايمن وراحوا لمكتب رئيس الامن فى الكومباوند وانا فضلت مع الاستاذ ياسر واقفين وبعدين الاستاذ محمد مشرف الامن اخدنى وروحنا قسم المقطم وعملت محضر وبعدين روحت المستشفى علشان اعمل تقرير طبي وده كل اللى حصل.

س/ متى وأين حدث ذلك؟

ج/ الكلام ده حصل يوم الخميس 28 ابريل 2022 فى حوالى الساعة 10 مساءا امام بوابة 5 فى كومباوند بمنطقة المقطم.

س/ ما سبب ومناسبة تواجدك بالزمان والمكان سالف الذكر؟

ج/ انا شغال فرد امن فى الكومباوند. 

س/ من كان برفقتك ان ذاك؟

ج/ انا كان معايا الاستاذ ياسر أحد السكان وفرد الامن اسماعيل على ومشرف الامن ايمن عبد القوى.

س/ ما طبيعة عملك واختصاصك الوظيفي؟

ج/ انا شغال فرد امن تبع شركة خدمات امنية ومتعين فرد امن فى الكومباوند ومختص بتسجيل السيارات اللى غير ملاكى اللى داخلة بوابة 5 بالكومباوند.

س/ وما سبب تعدى المتهم عليك تحديد؟

ج/ علشان انا وقفت 4 أشخاص على البوابة كانوا داخلين له وقالولوا انى انا مردتش ادخلهم فجه الساكن وليد العال وتعدى عليا بالضرب.

س/ هل تقف على بيانات الاربع اشخاص الذين قمت باستقافهم اثناء فترة عملك؟

ج/ لا بس انا سجلت الرخصة الخاصة بالعربية وصورتها على العربية.

ملحوظه/ حيث قام الماثل بالدخول فى ملف الصور الخاص بهاتفه المحمول وقام باطلاعنا على رخصة القيادة بالسيارة محل واقعة التحقيق وبمطالعتها تبين انها تسير ملاكي.

س/ ما سبب تواجد رخصة التسير معك؟

ج/ انا بحكم شغلي بصور رخص السيارات الغير ملاكى وبسجلها فى دفتر الاحوال وبعد ما اخلص فترة عملي بقوم مسحها من على تليفونى وده اجراء امنى.