قال المخرج المصري العالمي محمد دياب، إنه التقى أحد أصدقائه قبل 18 عام، وكان وقتها يعمل في بنك، وظل يحكي لصديقه عن فيلم بشخصيات جميعها أجنبية، وكان يتحدث معه بمنتهى الثقة بأن هذا الفيلم هو الذي سيصنعه في هوليوود.
أضاف محمد دياب، في لقائه مع الإعلامية منى الشاذلي، ببرنامج "معكم منى الشاذلي"، عبر قناة CBC، أن هذا الحلم ليس صدفة ولكن طريق يفكر فيه منذ كان صغيرا، مردفا: "لما درست في أمريكا من 16 سنة، عرفت إن قوتي لما أرجع لبلدي، إن أنا أعمل فن خاص ببلدي يخليهم نفسهم يشتغلوا معايا، وده خلاني كتبت أفلام، وحسيت إني عايز أخرج، ولما عملت فيلم 676 كنت مستني الفيلم ده ينططني بره، وفعلا اتوزع في 50 أو 60 دولة، والروائي البرازيلي باولو كويلو أشاد بالفيلم جدا".
وتابع المخرج محمد دياب: "وبعد ما عملت فيلم اشتباك بشهر، جالي فيلم للأمريكي توم هانكس، ولكن ماكنتش حاسس إني أحسن واحد عامله، والفيلم كان بيتكلم عن حرب أنا مش فاهمها وحاجات مش فاهمها، ولكن ده كان طريق واختيار، وما بين كل فيلم وفيلم أخرجته كنت بقعد 5 أو 6 سنين ونص، لأن ده قرار بأني هعمل فيلم جيد".
وأكمل: "في سنة 2018 أنا وأسرتي خدنا مخاطرة تانية بأننا هنسافر لأمريكا وهنبدأ تاني من الصفر، وقعدنا سنتين بنعافر، ولكن كان عندما أمل واتعرض علينا مشروع واتنين وتلاتة، وكنا خايفين نبدأ بمشروع لو انت أجنبي زي حالاتنا عملت مشروع في أمريكا مش جيد، انت مش هتشتغل تاني، فوكيل أعمالي جالي في يوم من الأيام بعد 3 سنين بأن فيلم Moon Knight عايزين له مخرج، وأنا قرأت المشروع أنا وسارة اللي تعتبر شريكتي في كل حاجة".
