أعلن الفنان ياسر جلال عن تبرعه بمبلغ ثلاثة ملايين جنيه لصالح صندوق تحيا مصر، اليوم الأربعاء. وأضاف ياسر جلال، لـ"اليوم السابع": "المرة دى بعلن عن الجهة والمبلغ اللى اتبرعت بيه، لأنى بتمنى إن كلنا نشترك، ونعمل اللي نقدر عليه، وبدعى زملائى النجوم أنهم يتبرعوا باللى يقدروا عليه، عارف إن في منهم عمل الموضوع قبل كدة، بس لو عملوا ده تاني يبقي شيء عظيم".
وتابع ياسر جلال كلامه: "يعلم ربنا إن السبب اللي خلاني أعمل كدة هى الأزمة اللي بتمر بيها مصر دلوقتي، أنا راجل لا غاوي شهرة ولا نجومية، أنا بشتغل وبخلص شغلي وبروح أقعد مع مراتي وأولادي، وبعمل ده لأن كلنا شايفين إن البلد بيمر بأزمة كبيرة، والعالم كله بيمر بأزمة كبيرة، وإن شاء الله الأزمة تعدى لما كلنا نقف جنب بعض".
ويحضر ياسر جلال لمسلسله الجديد "علاقة مشروعة" استعدادا لدخول مواقع التصوير، مؤكدا أنه سوف يبدأ تصوير خلال الأيام المقبلة.
يذكر أن آخر أعمال ياسر جلال، مسلسل الاختيار 3 فى رمضان الماضي، وحقق نجاحا كبيرا، شاركه البطولة أحمد السقا وكريم عبد العزيز، وعدد كبير من نجوم الفن.
