نجلاء بدر: ابتعدنا فى روليت عن صورة الفنانين المشوهة ولو حملت لا يمكن الإجهاض

أكدت الفنانة نجلاء بدر أنه لا يوجد شىء مشترك بين شخصيتها الحقيقة ودور شيرين الممثلة الذى قدمته في حكاية روليت من مسلسل "في كل أسبوع حكاية" وقالت: "مفيش تشابه بالنسبة للظروف لأن شيرين حملت وأجهضت وده محصلش عندى كمان جوزى ليس مخرجًا، ممكن إحساس شيرين هو اللى قريب من شخصيتى الحقيقة كفنانة".

وأشارت نجلاء بدر خلال ندوة "اليوم السابع" إلى أن الفنان دائمًا ما يكون إحساسه أعلى من باقى الناس، موضحة: "كل واحد له مهارات مختلفة عن الآخر، فالدكتور عنده مهارة والمحامى والمحاسب، أما الفنان فعنده حساسية للكلمة والحدث، لأنه طول الوقت يتعامل مع احساسيس الآخرين حتى عندما يجسد شخصية داخليًا فيجدسها بإحساس الآخرين وليس إحساسه هو، لكن المواقف بين شيرين ومحمود في حكاية روليت ممكن تكون متشابهة مع ناس أخرى".

وشددت نجلاء على أنه كان هنا إصرار على تقديم صورة الفنان بشكل إنسانى بعيدًا عن الأعمال التي صورت الفنانين بشكل مشوه وأصبح هذا النمط هو السائد قائلة: "على فكرة إحنا كفنانين عتبنا على فكرة تقديم صورة الفنانين بشكل مشوه، ليه إحنا دايما لما نيجى نصور الفنان في الدراما بيكون زى رجل الأعمال وبقى الموضوع تابوه، والحقيقة ده مش خطأ فينا إحنا ولكن خطأ في الكتابة، ومن قديم الأزل لو اتفجرنا على أفلام زمان كانت الممثلة دائمًا ما تظهر بالسيجارة والكأس مش عارفة ليه، هو نموذج ممكن يبقى موجود علشان ما أقولش إن كل ده مش موجود".

واستكملت نجلاء بدر: "أنا أول ما اتقالى إن الدور ممثلة، دماغى راحت للنمط السائد اللى بيتعمل، لكن لما لقيت أنه إنسانى انبسطت جدًا بالموضوع وبالعكس خفت إن الفنانة بس اللى ممكن تجهض البيبى علشان نجاحها، وذلك غير صحيح لأنى شفت دكاترة عملوا ده، وأنا أعرف دكتورة كانت بتحضر دكتوراه وكانت مسافرة تدرس بره وهى حامل فنزلت البيبى علشان مكانش ينفع تسافر وتدرس وهيا حامل وتبقى لوحدها لأنها كانت هتقعد 3 سنين فالموضوع لا يخص الفنانة بس ولكن تخص أى ست، وبالنسبة لى لو حملت لا يمكن هضحى بجنين علشان شهرة فميش أم في الدنيا بتعمل ده لأنه مش سهل إذا كان أنا عشت الموقف تمثيل وتعبت نفسيًا".

يذكر أن نجلاء بدر قدمت بطولة حكاية "روليت" من مسلسل "في كل أسبوع حكاية" التي تم عرضها على قناتى cbc وcbc دراما ومنصة watch it الرقمية الأسبوع قبل الماضى، وشاركها البطولة نضال الشافعي، إنجى شرف، دعاء حكم، أحمد يونس، أحمد باسم وماجد إسكندر ومن تأليف مصطفى جمال هاشم وإخراج معتز حسام، وجسدت نجلاء خلال العمل شخصية شيرين" الممثلة المتزوجة من مخرج وتجهض جنينها بسبب استعدادها لأول بطولة سينمائية.