صدر حديثا ضمن إصدارات معرض القاهرة الدولى للكتاب عن دار همسة ديوان عامية تحت عنوان "بكرة تروق" للشاعر الصغير ساجد محمد عبد الفتاح الذى يبلغ من العمر 14 عاما وهو أصغر عضو باتحاد الكتاب والمثقفين العرب وفائز بلقب السفير الثقافى الصغير للصين ضمن فعاليات دورة الألعاب الشتوية ببكين ومن المرشحين لجائزة الدولة للمبدع الصغير.
ومن أجواء الديوان يقول فى إحدى القصائد:
ومهما قالو فيا كتير
و مهما شافوا حجمى صغير
و مهما كتبو .. في التقرير
انا مبدع
و هم العجزة .. في التقدير
و قالوا .. إن أنا عاجز
و غالوا ياما فى التصوير
و فجأه.. طلعت انا الفايز
انا مبدع
أنا زيك .. أنا موجود
لكني زيادة .. في الميزة
أنا مولود ف قلبي قوة وغريزة
و بيها اتحدى واتخطى قمم و صعاب
و بيها بتفتح الأبواب
وبلدى عليا دى عزيزة
يقولوا اعاقه ... أو مانع
أقول ايه يعنى .. ايه المانع
هاحولها لطاقة و قوة
و أوري العالم.. بره وجوه
و اخلي علمي فوق مرفوع
و اخلي صوتي انا المسموع
و أنور عتمتي بشموع
صحيح ياما .. بعيش فى آلام
و اشوف ف الدنيا دي .. أيام
تحزني.. تبكيني
تخلي الدمعه على عيني ..
تسيل انهار
لكن بالهمه و الإصرار
بعديها
و نبتة حلمي برويها
و بذرة أملي انميها
انا جوايا روح فنان
انا زيك ..انا إنسان
انا مبدع .. أنا أقدر
اعدي بحر ليا…
وفى قصيدة أخرى يقول:
إن شوفت موج الحلم
عايم ف بحر حياه
و فتحتله صدرك
و رمى حلمك وراه
و شفته قصاد عينيك
غدار بيتحول
ضاع اللي حققته
عيد تاني م الأول
و اعلم بإن الله
شايفك .. ومش سايبك
ولا تسأل .. حد سواه
ولا حد .. هيجاوبك
إن خوفت يوم من شيء
و الدمع كان سايل
ارمي حمولك عليه
هيعدل المايل
ماهو أصله .. إسمه لطيف
بيهون الأيام
من لطفه خلى النار
عدت برد و سلام
خلى العيون تغشى
و كأنها بتنام
خلاها مش شايفه
و عدى النبي بسلام
اسمه رحيم و رؤوف
قادر يشيل الخوف
ليه قولي بتعاني ؟؟
و انت معاك المعين
ده بدعوه من الفاروق
الخير نزل بساتين
خلي في حبة قرب
بينك و بين الرب
و لو ف يوم تدعي
قادر يزيل الكرب
و كاس الفرح .. هتدوق
صدقني بكره .. تروق
و قول ورايا ... ياااااارب
غلاف الديوان
تم أضافة تعليقك سوف يظهر بعد المراجعة