استعرض أحمد عطا الله، فى برنامج "مصر تغني" فى حلقة اليوم، الأربعاء، على القناة الأولى بالتليفزيون المصرى، فن الموال الشعبى من داخل مسقط رأس الفنان الراحل يوسف شتا، بمحافظة القليوبية.
وقال أحمد عطا الله فى مستهل حلقة اليوم: "الغناء الشعبى هو لسان الناس والموال هو حكمتهم، والموال مش مجرد فن بيعبر عن أحوال المجتمع اللى بيطلع منه، الموال عامل زى المرايه اللى بتعكس قيم المجتمع وبيحاصر الغلط والعيب وبيدينه، ويشارو على الصح ويدعمه ويعليه، وكل ما كان الفنان اللى بيقول موال قادر على التعبير عن قيم المجتمع اللى عايش فيه كل ما زاد تأثيره، مش شرط نجوميته، تأثيره عند جمهوره، زى الفنان الراحل يوسف شتا".
أضاف مقدم البرنامج: "فى الخمسينيات لقط زكريا الحجاوى يوسف شتا وخده مسرح وزارة الثقافة، وساعده فى تقديم ورق اعتماده بالإذاعة واتفتح قدامه باب جديد، باب الميكروفون، ألف وغنى تتر التمثيلية الإذاعية المدعية، بطولة الراحل شكرى سرحان وكريمة مختار".
وأكمل: "يوسف شتا غنى موال مسلسل اللاعبون بالنار بطولة دلال عبد العزيز، وغنى لمعظم الأحداث السياسية والاجتماعية التى عاشتها البلد، غنى لثورة 1952 ولنصر أكتوبر 1973 ولزلزال 1992، وفضل يغنى حتى رحيله فى 2012، ورحل بعد ما أسس مدرسة كبيرة باسمه لها تلاميذ ومريدين".
وسلط أحمد عطا الله، فى برنامج "مصر تغني" فى حلقة اليوم، الأربعاء، على القناة الأولى بالتليفزيون المصرى، فن الموال وتاريخ الفنان الراحل يوسف شتا.
والتقى أحمد عطا الله، بالبرنامج، بعدد من مفضلى أغانى الفنان الراحل يوسف شتا، للحديث عن رأيهم فى موال الفنان الراحل، وقال أحد الأشخاص: "الحاج يوسف شتا إحنا طلعنا لقينا أبهاتنا وجدودنا بيسمعوه، وهو راجل فنان ومشهور وكان راجل مهاجم وعنده تلقائيات فى الكلام".
وأكمل: "عندى البيت كله بيسمع يوسف شتا، ومواله رائع، وأنا أحفظ معظم شغله لأن أنا عاشق، لأن أنا لما سمعته فى الأفلام وجدت إبداعات له".
والتقى عطا الله، بأحد تلاميذ يوسف شتا، الفنان الشعبى لطفى العنانى، بكفر حجازى بالمحلة الكبرى، والذى قال: "أنا كنت أغنى مع فنان ليس كبار، وكنت على قدى وكنت فى فرح فى حلوان وفيه عروسة بيحنوها قبل ما نشتغل على المسرح، وقاعدة جنبها بنت بتعيط إنما جمالها ماشفتهوش لحد الآن، وأنا قاعد مع الفرقة وقلت كلمة سبحان اللى خلق هذا الجمال والحسن، فراحل قالى انت عارف هى بتبكى ليه؟ علشان أبوها هيجوزها راجل يعدى الـ60 سنة وسوقنا عليه طوب الأرض، فأنا ألفت أغنية فى الحال على حال البنت".
