قال المنتج محسن جابر إن استخدام أصوات مطربين بالذكاء الاصطناعى أعتبره تشويها ولعبا بالنار، خصوصا أصوات عبد الحليم وأم كلثوم وعبد الوهاب، ولا بد أن يكون كل إنسان حذر في التعامل سواء فنيا أو إعلاميا، وكما قرأنا في السوشيال خبر عمرو مصطفى أنا حزين جدا لأنه من الفنانين الذين أعتز بيهم، وهو حاطت بوسط ومقطع من الأغنية".
وأضاف خلال حلقة اليوم من برنامج التاسعة المذاع على القناة الأولى مع الإعلامية شافكى المنيرى: "لو كان عمرو مصطفى عاوز يقول حاجة كان اتصل بيا لأن أنا اللى اكتشفته، أول أغنية ليه اللى هي خليك فاكرنى اللى غناها عمرو دياب، أنا اللى عملتهاله وأنا بعتبره ولد من أولادى، ولكن إنه يقدم على خطوة زى دى وهى منتشرة عالميا لكن إننا نستخدمها في الشرق الأوسط كشعوب مش عارفة يعنى إيه حقوق ملكية فكرية هذا عبث لا بد أن يقف عند حده، ولو ابتدت الأغنية دى هنلاقى بعدها سلسلة من الأغانى ومن التشويه".
وتابع: "الذكاء الصناعى لا يتوقف عند الفن ولكنه يدخل في الفكر الصناعى والسياسى والاجتماعى، ولعمل تشريعات له لا بد أن يأخد وقته، والقانون المصرى اللى صدر في 2002 فيه ما يكفى لردع مثل هذه الأمور، ولسنا في حاجة لإضافات فيما يخص المصنفات الفنية والقانون أعطى للفنان حق أبدى حق أدبى لحماية أى تشويه أو لعب أو عبث في صوتهم أو اسمهم".
وأكمل: "مش هعمل محضر ضد عمرو مصطفى إلا إذا هو تمادى، وأكيد هيحصل جلسة لكن كان لازم نعمل وقف للأفكار فى الأول".
