"كل ما تنفقه من أموال في متاع حياتك ذاهب إلا ما تنفقه في سبيل الله عز وجل فهو ماكث لك"، هذا ما قاله ماجد القاضى في بداية حديثه لبرنامج "فتحى شو"، اعداد وتقديم محمد فتحى عبد الغفار، والذى أكد أن الراحمون يرحمهم الرحمن وهذا ما وجدته حقيقى على أرض الواقع فنحن نرحم من أجل ما نفعله من مخلوقات الله عز وجل التي لا مجال لها في نفاق مع بنى البشر .
وقال "القاضي"، "عمل الخير ثقيل على بعض النفوس، واللى يعمل الخيرهيلاقى الخير في الدنيا وفى الاخره، وما يحدث وتراه العين هو جزء من عمل الخير مما يقدمه الإنسان من نفسه وروحه ووقته، فاذا دفعت عشرة ستعود لك عشرات أو مئات أو ربما الالاف والله عز وجل يضاعف لمن يشاء" .
واستكمل، "انا اخويا الكبير توفى من 4 سنوات ومن اليوم ده حسيت ان الدنيا فانيه ومفيش حاجة هتقعد لك الا عملك بس عملك ثم عملك ثم عملك، حتى فلوسك اللى في جيبك كلها مش ليك يا رايحة لدكتور يا لميكانيكى يا في اكلك انت واهل بيتك فا كلها رايحة واللى قاعد من مالك بس هو اللى بتنفقه في سبيل الله ، وفاة اخويا كسرت ضهرى فقررت اكسبه ثواب في اخرته على سبيل الصدقة الجارية".
وأضاف، "من هنا جاتلى فكرة انى اعمل برج حمام صدقة جارية اطعم فيه مخلوقات الله عز وجل من حمام وعصافير واللى يجى ياكل ويبات ويمشى من الطيور المهاجرة الأول كنت بشوف عشرات الطيور بتيجى تاكل دلوقتى انا شايف الالاف ما شاء الله بتيجى عند مدفن اخويا وتنزل تاكل من عنده وهى صدقة جارية بمعنى ان الاعداد لما كبرت في الشهر بيخرج حوالى 60 جوز حمام بناخدهم نوزع منهم على الغلابة والباقى بيتباع علشان نصرف على اكل البرج ".
ونوه، "البرج الأول تكلفة بناءه والاكل اللى كان بيتحط للطيور يوميا كنت بجيبه ودلوقتى البرج هو اللى بيصرف على نفسه، لانى مضمنش حياتى ومش متاكد ان اولادى يكملوا ورايا المشوار ده ول لاء علشان محدش يجى يقول ده عبء عليا فا خليت البرج هو اللى يصرف على نفسه بنفسه ".
وأضاف، "المستفيد الأول من فعل الخير هو صاحب الفعل، ربنا سبحانه وتعالى قال إن أحسنتم أحسنتم لأنفسكم وإِن أسأتم فلها، صدق الله العظيم وده معناه ان الخير اللى بتعمله ليك وبرضه الاساءه اللى هتعملها لا قدر الله فهى ليك".
