قال الرئيس عبد الفتاح السيسى، إن الدولة المصرية أنفقت 180 مليار جنيه للبناء فيما يتعلق بمنظومة التعليم العالى فى مصر، مبينا: "الأرقام دى مش داخل فيها أبدا تكلفة التشغيل، سواء اللى بندفعه كحكومة أو الجامعات الخاصة اللى بتتعامل به مع فكرة التعليم".
وتابع الرئيس السيسى، خلال مشاركته بجلسة بناء الإنسان ضمن فعاليات يوم الاحتفال بتفوق جامعات مصر: "أنا عايز أقولكم أن الأرقام دى كانت قيمة الجنيه فيها غير دلوقتى، إحنا كنا بنتكلم فى 2014 و2015 لغاية 2016 كان الدولار بـ8 و9 أو أقل، وبعدها بشوية بقى بـ16 جنيه، ولو إحنا بناخد القرار فى بناء هذا الحجم ده دلوقتى يا ترى الرقم هيبقى كام؟ ثم أنا فقدت فرصة امتلاك القدرة فى بناء منظومة تعليم مناسبة".
وتابع الرئيس السيسى موجها حديثه لوزير التعليم العالى ورئيس الوزراء: "انتوا قلتوا عايزين نعمل 17 جامعة تكنولوجية، أنا ماعرفش انتوا عاملين حسابكم على كام؟ أتصور 500 مليون"، ليرد عليه الوزير أيمن عاشور، قائلا: "هى التكلفة التى كانت مخصصة للجامعات القديمة 600 مليون جنيه، فإحنا نقول هنوصل لمليار دلوقتي".
وأكد الرئيس السيسى قائلا لرئيس الوزراء: "أنا يا دكتور مصطفى من صندوق تحيا مصر مستعد ندخل فى هذا البرنامج، نبنى الجامعات التكنولوجية الـ17، بنصف القيمة والحكومة تدفع نصف القيمة، موافق يا دكتور؟".
وأتم الرئيس: "المبادرة الثانية بشأن المبتكرين، إحنا ممكن نساهم معاكم من صندوق تحيا مصر بـ50 مليون إضافية يبقى 100 مليون".
