أبوها من دمشق لكن أمها مصرية، وترتيبها بين أخواتها كان العاشر بين 17 أخا وأختا منهم اختين شقيقتين هما كوثر وصباح و8 من والدها و6 من والدتها انفصل أباها عن أمها وعمرها 5 سنين، بعد كده امها اتجوزت وجوز أمها اتولى تربيتها هي وأختها.
![3 3](https://img.youm7.com/ArticleImgs/2024/1/26/64488-3.jpg)
سندريلا الشاشة سعاد حسنى، أتولدت 26 يناير فى حي بولاق ابو العلا بالقاهره لعيلة فنية وأبوها محمد حسني البابا اللي كان من اكبر الخطاطين وهي اخت المطربة نجاة الصغيره من الأب، كمان كان بيقال ان عازف الناى الشهير محمود عفت أخوها لكن الحقيقة غير كدة وطلعت اختها في أحد اللقاءات ونفت صلة القرابة بين عازف الناي محمود عفت والسندريلا .
![10 10](https://img.youm7.com/ArticleImgs/2024/1/26/49191-10.jpg)
سعاد حسنى مكملتش تعليمها فى المدارس لكنها اتعلمت فى بيتها التمثيل بمساعدة جوز أمها واشتغلت فى الفن وهى طفلة صغيرة مع بابا شارو واكتشفها للسينما عبد الرحمن الخميسي، ولما اشتهرت لقبوها بسندريلا الشاشة العربية.
![18 18](https://img.youm7.com/ArticleImgs/2024/1/26/32635-18.jpg)
اشتغلت بالوسط الفني 30 سنة ومن أهم أعمالها في السينما "البنات والصيف"، "غراميات امرأة"، "امرأة وثلاثة رجال"، "السبع بنات"، "إشاعة حب"، "الزوجة الثانية"، "حب في الزنزانة"، "القاهرة 30"، "الراعي والنساء".
ومن المواقف الكوميدية اللي حصلت ليها في التصوير خلال تصوير الفيلم الزوجة الثانية فوجئت باصرار العمدة القرية بالزواج منها عشان يسيبها تكمل تصوير في البلد لكنها رفضت وكملوا التصوير في قرية تانية.
![17 17](https://img.youm7.com/ArticleImgs/2024/1/26/38271-17.jpg)
وعن زيجاتها اتجوزت المخرج علي بدرخان، وبعد كده من كاتب السيناريو ماهر عواد اللى رشحها لعمل فى التلفزيون فى مسلسل (هو وهى)، كمان أخدت جوايز كتيرة عن أفلام (الحب اللى كان) و(غروب وشروق) مع صلاح ذو الفقار ورشدي اباظه و نافست الفنانة فاتن حمامه.
![5 5](https://img.youm7.com/ArticleImgs/2024/1/26/111708-5.jpg)
كما قالت اخت سعاد حسني قالت في أحد اللقاءات التليفزيونية أن كان فيه قصة حب بين سعاد وعبد الحليم حافظ وكان بيلعب معاهم ويدلعهم ويعاملهم زى اولادة وكان مع سعاد على طول ودايما بيزورهم في البيت.
وبالرغم من شهرتها وانشغالها الدايم في شغلها الا انها كانت متعلقة باخواتها وأولادهم جدا فكانت معاهم في أفراحهم وأعياد ميلادهم ودايما مجمعاهم وعاملة بهجة وسط العيلة بالرغم من مرضها.
مسيرة الفنانة سعاد حسني ومشوارها الفني كبير فبلغ رصيدها السينمائى 91 فيلم أشهرهم"حسن ونعيمة"، و"صغيرة على الحب"، و"غروب وشروق"، و"الزوجة الثانية"، و"أين عقلي"، و"شفيقة ومتولي"، و"الكرنك" و"خلى بالك من زوزو" وغيرها بالإضافة إلى مسلسل تليفزيونى واحد "هو وهى" مع الفنان الراحل أحمد زكى.
حصلت على الكتير من الجوايز خلال مشوارها الفني ومنها أفضل ممثلة للأفلام الروائية عن دورها في فيلم غروب وشروق وخمس مرات من وزارة الثقافة ومهرجان الإسكندرية عن فيلم الراعي والنساء وشهادة تقرير من الرئيس الراحل محمد أنور السادات لعطائها الفني .
رحلت الفنانة سعاد حسنى 21 من يونيو فى ظروف غامضة بلندن تاركة ورائها تاريخًا طويلاً لا يمكن نسيانه استطاعت أن تدخل قلوب محبيها ومعجبيها من أوسع الأبواب ونجحت فى أن تعبر عن مشاكل وهموم وأفكار وأحلام كل طبقات الشعب المصرى.
تم أضافة تعليقك سوف يظهر بعد المراجعة