خالد الجندى عن السحر: الدول بتدمر بالريموت وإحنا لسه مؤمنين بـ"عفروتو"

أكد الشيخ خالد الجندي، عضو المجلس الأعلى للشئون الإسلامية، أن الأمة الإسلامية تواجه أزمة حقيقية تتعلق بموضوع السحر، لافتا إلى أن الأمر أصبح شائعًا بين الناس على الرغم من كونه من الأمور التى تم نفيها فى النصوص الشرعية.

وقال عضو المجلس الأعلى للشئون الإسلامية، خلال حلقة برنامج "لعلهم يفقهون"، المذاع على فضائية "DMC"، اليوم الثلاثاء: "تخيل يقولك أصل فى سحر يا ابنى، السحر كان موجودًا قبل النبى وانتهى، مفيش فايدة الشيخ فلان والشيخ علان قالوا أن فى سحر، ويظهر أن الناس عندهم حالة هبل بسبب السحر، حالة تخلف واستشرت بين الناس بسبب فتاوى السحر التى ما أنزل الله بها من سلطان".

وأضاف: "يا جماعة، حد يقول لي: السحر موجود فين؟ وعنوانه إيه؟ ومين؟ وفين الكلام ده؟ والسحرة ما بيدافعوش عن نفسهم ليه؟ إذا كنت أنا واحد مثل حالتى كده وبعض العقلاء يقولون إنه ما فيش سحر، طيب سحرونا! طب عطلونا عن حياتنا! اعملوا لنا أى سحر، لكن لأنهم نصابين وكذابين بيحاولوا يدلسوا على الناس".

وتابع: "تخيل حضرتك الأزمة اللى إحنا عايشينها بجد، يعنى هى متصلة بموضوع الإعداد والمنهج العلمى، اللى بنتكلم فيه، الدولة انتصرت فى 73 بسبب الإعداد، يعنى الفخر اللى جناه بسبب الإعداد والمنهج العلمى، فى الوقت اللى إحنا شايفين فيه اللى ما عدوش حصل لهم أى شيء، فى نفس الوقت يا محترم، اللى شايفين فيه الصهاينة شغالين بالريموت كنترول، بيدمروا قادة الدول وبيدمروا أسلحة ويهدوا جيوش، بماذا؟ بالأجهزة الإلكترونية، بالريموت كنترول".

واختتم: "الانتصار، ما بقاش بالتحام جيوش، الانتصار بقى بالعلم والبحث العلمى والتكنولوجيا والبرمجة الإلكترونية والذكاء الاصطناعى، إحنا لسه عايشين مع شمهورش، لسه مؤمنين بعفروتو.. الكلام اللى إحنا فيه ده مأساة".