شدد شريف فتحي وزير السياحة والأثار، على أهمية التواصل والتنسيق بين المؤسسات سواء كانت نقابية أو تنفيذية، بعيدا عن السوشيال ميديا، كاشفا عن التفاصيل الكاملة لصيانة تماثيل قصر النيل.
قال الوزير في تصريحات لـ"اكسترا نيوز"، "الحقيقة الموضوع ده كله ابتدا من السوشيال ميديا واللي عرفته أنه في أحد النقابات طبعاً اللي بنحترمها وبنحترم القائمين عليها نزلت حاجة على الفيس بوك أو على مواقع التواصل الاجتماعي..وأنا بالنسبة لي الحقيقة يعني ما كنتش عايز أن أنا أعلق على الموضوع ده لأنه التواصل النقابي أو التواصل في المؤسسات سواء كانت نقابية أو مؤسسة تنفيذية أو غيره ما بيتمش عن طريق السوشال ميديا، بيتم عن طريق الحوار، بنقدر نرفع التليفون نكلم بعض النقابات دي تتبع معالي زميل وزير الثقافة يقدر يتكلم معانا في الموضوع أو غيره للتوضيح، إنما طبعا لما رجعت الموضوع لقيت أنه الموضوع ده مش أول مرة، وزارة الأثار بتعمله كمعاونة للمحافظات واللي بيحصل أنه بيستعينوا بالمجلس الأعلى للأثار على أساس أنه هو يساعد في تنظيف وصيانة هذه التماثيل واللي فهمتوا أنه لما كشفوا على التماثيل نتيجة للصيانات السابقة ما كانش فيها صدأ وده دليل أنه الأعمال اللي تمت قبل كده كانت أعمال جيدة من ناحية حماية التماثيل".
أضاف، "اللي تم في التماثيل دي هو نفسه اللي تم قبل كده في أعوام سابقة لم يتغير اللون لم يتم إضافة أي لون ولا دهان ولا أي حاجة.. التمثال بيتنظف من التراب .. أنا ده حسب ما فهمت من الفنيين اللي أنا بقدر شغلهم كتير .. وبعدين بعد كده بيتغسل بمادة من صابون متعادل كده معين أو حاجة كده وبعدين بيتحطله طبقة كوتينج من بره ملهاش لون بتدي لمعة في الأول، إنما طبعا لازم نعمل في حسابنا إن ده بياخد سنين طويلة، بيبقا معرض للشمس والهواء والتراب والعوامل الجوية بصفة عامة فالحقيقة مفيش تغيير لون مفيش ما يدعو لابداء القلق مفيش يعني عايز أقول أنا الموضوع واخد يعني اهتمام على السوشيال ميديا أكبر من الحجم اللي هو يعني يجب أن ياخدوا".
واصل، " أي حد عنده أي اقتراح للتحسين هناك قنوات طبيعية جدا للتواصل في هذا الموضوع وإحنا بنرحب بيها في إطار التعاون وفي إطار عمل ما فيه مصلحة عامة للبلد وللأثار أو للتماثيل الثقافية اللي هي طبعا مش تبعنا في الأثار بس برضه ما زلنا نحترمها ونحافظ عليها".
وبسؤاله حول قراءته للجهود التي قامت بها الدولة المصرية خلال الفترة الماضية لمواجهة كل هذه الشائعات وتوعية المواطن المصري خاصة في الفترة الأخيرة؟، رد بقوله:" طبعا مواجهة الشائعات شيء أساسي، نحن نواجه الشائعات بس هو في الأساس يجب أن لا ننصت لهذه الشائعات أو لا ننصت لما يثير الرأي العام خارج الأطر الشرعية .. يعني أنا النهاردة ممكن يعني عايز أقول ممكن حد يبعت لي او يتخاطب معي في موضوع معين عنده فكرة معينة الفكرة دي لما بيكلمني فيها بنقدر نتناقش فيها لو انا ما ردتش عليه في الفكرة دي او ان انا لم اتجاوب ساعتها ممكن يروح للسوشيال ميديا يقول انا كلمت الوزير والوزير لم يتجاوب وانا بشتغل لمصلحة الدولة انما النهاردة يبدأ التخاطب ببيانات صحفية من جهات لها صفة على السوشيال ميديا، السوشيال ميديا ليست وسيلة التواصل داخل الدولة المصرية ولا يتم بناء اجتماعات او تحسينات على بيانات بتطلع على السوشيال ميديا سوشيال ميديا انما العمل المؤسسي له القنوات بتاعته الطبيعية اللي يجب ان نتعامل من خلالها".
أكمل: "حرصنا على الأثار المصرية بصفة عامة كنا برضه لازم نفرق بين ما هو مسجل أثار وبين ما هو من التراث، ويجب أن نحافظ عليه 100% وأظن السادة المتخصصين في مجال الآثار عارفين مدى حرصنا في خلال الفترات السابقة على آثارنا والحفاظ عليها وتطوير العمل بيها..وفعلا أي حاجة فيها مصلحة عامة احنا جاهزين ان احنا ننصت لها بس بالشكل الصحيح وبالشكل المؤسسي اللي هو يعمل إيجابية ويعمل يعني عايز اقول ايه حالة من التعاون بصفة عامة مش موضوع ان انا بحاول يعني مش عايز اوضح اكتر من كده بس يعني هو موضوع مش موضوع اكشن او ساسبنس او حاجة زي كده".
