ينشر "اليوم السابع"، أقوال اللاعب مؤمن زكريا فى واقعة إيهامه بالعثور على أعمال سحر خاصة به، أمام مدفن بمنطقة الخليفة، واقوال المتهمين المتورطين في الواقعة.
وإلى نص أقوال مؤمن زكريا في التحقيقات..
اسمى / مؤمن زكريا عباس الضاوي
السن / 36 سنة
أعمل / لاعب كرة قدم سابق
س ما تفصيلات بلاغك؟
ج اللى حصل إنى لقيت واحد قريب زوجتى اسمه مصطفى كلمها، وقالها إن فيه واحد جارهم اسمه محمد إمام، قاله إن فيه ناس لقوا عمل معمول لمؤمن في المقابر عشان كان العمل معمول على صور بتاعتى، وكمان كان فيه عروسة مربوطة من إيديها ورجليها ودبابيس، وكان عليهم طلاسم، وقالولى تعالى المقابر عشان تشوف العمل، قالولي إحنا كنا بنحفر عشان نزرع صبارة، وهناك لما وصلت قابلت الناس اللى اتمسكوا وكان معاهم واحد هرب، وهناك وروني الحاجة في ميه بملح والورق كان دايب في الميه، وكان فيه صورتين واحدة كبيرة وواحدة صغيرة عليها طلاسم، وكان فيه عروسة مربوطة من الإيد والرجل كان مكتوب عليها طلاسم والورق كان محطوط في الميه ودايب وبعد كده أخدنا العروسة وبقيت الورق واتخصلنا منه وهناك كان فيه واحد بيصور الموضوع ده هناك من وقت ما أنا دخلت المقابر واستأذنته إنه ميصورش ويمسح الصور ديه ومحدش ينزل حاجة ولا ينشر حاجة، وبعد كده فوجئت بتداول الصور على مواقع التواصل الاجتماعي ونشر أخبار أثناء وجودى بالمقابر، وهوده كل اللي حصل.
اقوال اللاعب مؤمن زكريا
اقوال مؤمن زكريا
وحصل "اليوم السابع"، على أقوال المتهم الأول "التربي"، وإلى نص الأقوال...
س: ما الذي حدث إذا وما هي ظروف ضبطك وعرضك علينا؟
ج اللي حصل إنى شغال تربى في مقابر سيدى عقبة في الخليفة، وفي يوم كنت بزرع صبارة في الترب مرة واحدة وأنا بحفر لقيت كيس بلاستيك فأمسكته وفتحته عشان أشوف فيه إيه، لقيت فيه لفتين، وبفتح أول لفة لقيت مكتوب فيها طلاسم وحاجات مش مفهومة، واللفة الثانية بفتحها لقيت فيها 3 ورقات بيض مكتوب عليها كلام مش مفهوم، وفيها صورة كابتن مؤمن زكريا، والصورة مكتوب عليها بالأحمر كلام مش مفهوم ومدبس فيها أكثر من دبوس، مكتوب عليها بالأحمر وساعتها أنا صورتهم بتليفون محمد جوز أمنية.
اقوال المتهم الاول
وإلى نص التحقيقات مع المتهم محمد عمر، رقم 2 بأمر الإحالة ..
س: ما قولك فيما هو منسوب إليك من أنك معهم وآخرين بإذاعة أخبار وإشاعات كاذبة عمدا بقصد تكدير الأمن العام وإلقاء الرعب بين الناس وإلحاق الضرر بالمصلحة العامة على النحو المبين بالأوراق؟
ج: محصلش
س: ما الذي حدث إذا وما هي ظروف ضبطك وعرضك علينا؟
ج اللي حصل أن تقريبا الأربع اللى قبل اللى فات في مقابر عيلة مراتى أمنية في الإمام الشافعي الخليفة رحت أجيب مراتی لقیت رمضان ابن خالها بيحفر عشان يطلع صبارة عند الترب وهو بيفحت بالخشبة لقى كيس أسود فطلعه، وقالی افتح صور فيديو ده عمل، وأنا فتحت الكاميرا بتاعة موبايلي وصورت، ولقيت العمل عبارة عن لفتين ورق مربوطين بسلك وقماشة رسمة العروسة عليها دبابيس وحاجات كتير ومكتوب عليها حاجات كتير وصورة كابتن رمضان، وقالي تعالى نروح نجیب جرادل ميه عشان نبطل العمل، وجاب جردل ميه وملح وجردل تاني فيه ميه، قعد يقرا عليها قرآن، وقالي صور فيديو وصورت فيديو، وقفلت كلمنا ابتسام مرات محمد إمام وشهرته زيكا، فجت هي و زیکا وساعتها زيكا قال إنه يعرف مصطفى ابن خالة مرات مؤمن زكريا وكلموه، وبعدين قالى إنه هيكلم كابتن مؤمن، وبعدين هيكلمو وبعدها مصطفى جه على القرافة وريناله الحاجة، وبعدين قالى إن تليفوناتهم مقفولة، وأول ما تعرف توصلهم هنوصلهم، وبعدها بساعتين كلم زيكا وقالهم إنهم في إسكندرية وجايين بعد يومين، وبعد يومين چه کابتن مؤمن ومعاه أشخاص و2 شيوخ، والشيوخ نزلت أبطلت العمل وقروا قرآن، وبعد كدة كابتن مؤمن مشي، ورمضان عرف اللي حصل لواحد صاحبه اسمه مودي، ومودي ده كلم صحفي وسجل لرمضان ومقلوش أنه صحفي، و قاله إنه أخو مودي، وعرف اللي حصل ونشر من ورا رمضان، ويوم السبت الساعة ٧.٣٠ بالليل لقيت رمضان بيكلمني وبيقولي إن أحمد بيه الكردي عايزني عند بيته وروحنا لريهام سعيد الساعة 10 بالليل في الإنتاج الإعلامي، وبعد كده روحنا القسم وده اللي حصل.
اقوال المتهم الثانى
وجاءت أقوال المتهمة الثالثة بأمر الإحالة المتهمة "منية ك"...
س: ما الذي حدث إذا وما هي ظروف ضبطك وعرضك علينا؟
ج اللي حصل ان رمضان ابن خالى تربى في مقابر سيدى عقبة من فترة لقى أعمال سحر وكان تقريبا يوم ١٤, او ١٥ / ٢٠٢٤/٩ - في ترب هو مشرف عليها وكانت خاصة بالكابتن مجدى عبدالغنى وبعدها كابتن مؤمن زكريا جه هو وشيوخ وفكو الأعمال ديه وبعدها رمضان حكى الموضوع ده لصيدلى اسمه محمد زغلول والموضوع ساعتها انتشر في المنطقة وبعد كدع بسمة أخت رمضان بعتت لمحمد مدير أعمال المذيعة ريهام سعيد وحكيتلها على الموضوع بتاع الأعمال بتاع كابتن مؤمن زكريا، وقالتها أنا ممكن اطلع مع المذيعة ريهام سعيد واحكى الموضوع بتاع كابتن مؤمن زكريا مقابل أنى أخد 100 ألف جنيه، وبعدين يوم السبت اللى فات كنت قاعدة أنا وبسمة لقينا تليفون بسمة بيرن ردت ولقت رمضان أخوها بيقولها إن الحكومة أخدته وأنهم بيدورو علينا، ساعتها أنا وبسمة اتصلنا بمدير أعمال ريهام سعيد وقلتلها عاوزين نطلع مع ريهام سعيد عشان نبرأ نفسنا، وبعدها أنا رحت أنا وبسمة وجوزى محمد عمر وحكيم على مدينة الإنتاج الإعلامى، وبعدين رحنا القسم يوم السبت الساعة ١١.٣٠ بالليل واتعرضنا النهاردة على النيابة وهو ده كل اللي حصل.
اقوال المتهمة الثانية
