الفنانة منال سلامة عن طريقة تربية أبنائها: "كنت عاملة زي عبد الغفور البرعي"

قالت الفنانة منال سلامة، إن زوجها المخرج عادل أديب، عندما يكون متواجدا في المنزل، يعطي أبنائه طاقة إيجابية من خلال الحديث معهم.

وأضافت خلال لقائها مع الإعلامية إسعاد يونس، ببرنامج "صاحبة السعادة" الذي يذاع على قناة "dmc": "أنا كأم كان ممنوع الديلفري، وكان عادل لما الأولاد يحبوا يشتروا ديلفري، بيتفق معاهم ويجيبلهم ديلفري، فكانت أميرة بتطلب الأكل، وتقعد تاكل وهو يقعد يشغلني ويتكلم معايا على ما تخلص المهمة".

وقالت: "علشان ما يدخلش جوايا الشك أن الأولاد جابوا أكل ديلفري، كانوا بيرموا الشنط في الباسكت اللي خارج البيت".

وتابعت: "كان عندي إحساس دائم إني هموت بدري، وكنت عاوزة أعلمهم كل حاجة، ولما كبرت ومامتش، أدركت أن أنا عملت عبء نفسي شديد، فكنت دائما عاملة زي أبلة الناظرة، أحب وأهزر وكل حاجة، لكن كان في حاجات مفيهاش هزار".

وقالت: "علي ابني الكبير لأنه كان أول مولود، كنت حازمة جدا معاه، كنت عبد الغفور البرعي، زي ما كان بيتعامل مع ابنه عبد الوهاب، أنا كنت النموذج ده بالظبط".