بيومي فؤاد وليلى عز العرب يشاركان أبطال ذوى الهمم في مسلسل وصية جدو

قال محمد الأنصاري، مخرج مسلسل وصية جدو، والذى شارك فيه مجموعة من الفنانين من ذوى الهمم ونجوم آخرين لـ"اليوم السابع":" من حق أطفالنا وشبابنا من ذوى الهمم أنهم يعبروا عن أنفسهم من خلال مواهبهم وفنهم وده اللى خلانا ندمجهم في الأعمال الدرامية، وفكرة مسلسل وصية جدو هي التجربة الثانية بعد مسلسل القضية 404 اللى كان بيناقش 12 قضية عن ذوى الهمم،  كنا بندرب الأولاد من 2019، وكمان معانا أطباء ومدربين لتأهيلهم".

وأضاف: "عملنا مسرحيات واسكتشات وبدأنا تصوير المسلسل من 3 سنين والمسلسل كان إنتاجنا إحنا وأولاد ومتطوعين، وتانى عمل فكرنا إننا ندمجهم مع أصحاء في المجتمع ومع نجوم كبار وعملنا مسلسل وصية جدو من إنتاجنا أيضًا لدمج ذوى الهمم مع النجوم زى الفنان بيومى فؤاد والفنانة ليلى عز العرب والفنان ياسر الزنكلونى والفنان حمزة العيلي والفنان ياسر عزت، اللى رحبوا بالفكرة أول ما عرضناها عليهم ومتأخروش علينا لحظة وكانو ممكن يلغوا مواعيد عندهم عشان ييجوا التصوير".

أبطال مسلسل وصية جدو

وقالت سندس عادل سيناريست المسلسل: "في البداية كان الموضوع صعب عليا كان فيه رهبة مش عارفة إزاى اتعامل معاهم وإيه الكلام اللى هيبقى سهل عليهم واللى هيتفهم ومع الممارسة قعدت معاهم أكثر وبقيت أحس إن دماغى هي اللى بتتكلم بقيت أسمع صوتهم وهما بيقولوا الجملة وألاقى القلم بيكتب لوحده، كانت تجربة حلوة جدًا".

وقالت الفنانة ليلى عز العرب: "مسلسل وصية جدو عمل جميل ومبهج وأنا مبسوطة إنى شاركت مع أبطال ذوى الهمم لأنهم متعددو المواهب وبيدوا لأى فنان طاقة إنه يقدر يدى كل ما عنده ويكون مبسوط وهو بيمثل معاهم، هما نجوم وأبطال وإحنا سنيدة معاهم لكن هما اللى فنانين وموهوبين محتاجين بس فرصة إننا نسمعهم ونشوف موهبتهم".

بيومى فؤاد مع أبطال المسلسل

ومن جانبها قال الفنان بيومى فؤاد: "أنا كنت سعيد معاهم جدًا وسعيد بتجربة التمثيل معاهم، أنا كان معايا 3 من أبطال ذوى الهمم الفنانين، أنا غيرت منهم ومن شطارتهم وأدائهم وإحساسهم فاهمين أوى وفاهمين المشاهد اللى هيعملوها وعارفين كويس هما هيعملوا إيه وبيحفظوا بسرعة، حتى لو المخرج غير المشهد وغير كل حاجة بيقدروا يحفظوا ويستوعبوا بسرعة ده غير طلتهم وخفة دمهم كانوا عاملين أجواء في اللوكيشن".

جانب من الفعالية

وقالت الفنانة رانيا يوسف: "أنا بحب الأطفال عمومًا وهما واخدين قلبى وبحبهم أوى وأتمنى أشارك معاهم في عمل جديد ومن غير أى مقابل مادى، ذوو الهمم موجودين معانًا فى المجتمع والحياة فلازم يشاركوا معانا في المسلسلات والأعمال السينمائية والمسرح من حقهم".

مسلسل وصية جدو أبطال

وجدير بالذكر أن حفل تدشين مسلسل وصية جدو أقيم أول أمس وهو مسلسل كوميدى بطولة الفنانين بيومى فؤاد، وليلى عز العرب مع أبطال من ذوى الهمم، وحضر الحدث مجموعة من الفنانين.

مسلسل وصية جدو