تحدث الموسيقار عمرو سليم، عن ابن عمه الراحل الفنان هشام سليم، قائلا:"كان أطول منى، ونشبه بعض فى الجسم والوجه، وفى أحد المرات كنت بتكلم مع عمى صالح عنده فى البيت عن مغنية من بيرو بتغنى على البيانو وشرحت له القصة وكان فى حالة ذهول".
وأضاف عمرو سليم خلال حلوله ضيفا ببرنامج "واحد من الناس" الذى يقدمه الإعلامي الدكتور عمرو الليثي، علي قناة "الحياة"، في احتفالية خاصة وسهرة بمناسبة ليلة الكريسماس، عمى صالح مكنش يعجبه العجب كان سميع قديم وذواق، وكونى أعرف أفاجئه لقيت حد بيشدنى من لياقة القميص ويقولى انت يا حيوان، فلقيت وراى تنط زينب فقالتلى :"هو انت مش هشام كنت بنادى عليه وانت مش بتبص ولا بترد انتو لازم تمثلوا مع بعض وتطلعوا توأم".
ولفت عمرو سليم إلى أن "هشام" كان أكتر واحد فاهمنى وكان زى أخويا، وفاهم اللى جوايا، وكلمته قبل ما يموت وفى أواخر أيامه كان بيحسسنى إنه كويس ويقولى انا تمام مافيش داعى تتعب نفسك، وآخر مكالمة كنا بنحب بعض وقلتله ربنا يخليك ليا وتقوم بالسلامة، وبعد ما قفلت السكة بكيت لأنى كنت حاسس انه مش هيقوم بالسلامة وتوفى بعدها بيومين".
