رد المخرج بيتر ميمى، مخرج مسلسل الحشاشين، على الكثير من الملاحظات التى علّق عليها جمهور المسلسل، وذلك عبر حسابه بـ"فيس بوك"، حيث قال: "مبدأيا المسلسل من وحي التاريخ وده مكتوب نصا فى التترات يعنى مش وثيقة تاريخية لكنه دراما تاريخية.. هو تارنتينو لما قتل هتلر فى السينما كان حقيقة؟ أو نابليون فى فيلم ريدلى سكوت الأخير هل ده نابليون اللى فى كتب التاريخ؟ ديه دراما تاريخية.. حاولنا نعمل خيال تصويرى لفترة من الفترات لكن فى شكل درامي.. لكن رجعنا فى الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية".
وتابع: "هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد… ماركو بولو أو فلادمير بارتول أو برنارد لويس أو فرهاد دفترى… وكتير جدا، حسن الصباح كان بيعمل معجزات؟ لا طبعا!!! وده تباعًا مع الحلقات هيتفهم".
واستطرد: "الحشاشين مسلسل تاريخي بالعامية المصرية.. الأحداث بين أتراك وفرس.. لما عملوه الأتراك اتكلموا تركي ولما عملوه الأمريكان بيتكلموا إنجليزى.. احنا عاملينه فى مصر والترجمة موجودة فى كل بلد.. المسلسل بيتعرض فى روسيا وأمريكا وأكتر من بلد كل بلد بلغتها.. هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الأمريكية".
وتسائل بيتر ميمي: "ليه حسن الصباح؟.. حسن الصباح شخصية فذة وغريبة ومستفزة أنك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا فى منتهى الشر لكنهم شخصيات فذة غيرت العالم.. أو على مستوانا المصرى خط الصعيد أو سفاح إسكندرية".
وواصل تدوينته: "أم الخليفة رصد كانت نوبية الأصل، وإسكندرية مدينة فى مصر.. لأن فى مدن كتير باسم إسكندرية حوالين العالم.. لزم التوضيح للترجمة لأن فيه غير مصريين بيتفرجوا على المسلسل ومجاعة القاهرة الفاطمية مثبوتة تاريخيا، لكن تعددت أشكالها حسب المصادر، وهى على فكرة كانت قبل وصول حسن بفترة مش بعيدة بس ديه دراما (من وحي التاريخ)، ماتسمى بمعجزات حسن الصباح مقصود تتصور بالشكل ده.. وده هيبان تباعا وخصوصا مشهد الراوي حلقة 8، عم ملك شاه اتقتل بوتر القوس لأن ده كان عرف وتقليد، مين الست اللى بتظهر لحسن الصباح؟ ده فى حلقة 30 بقى لو ربنا ادانا عمر".
واختتم بيتر ميمي: "كل سنة وأنتم طيبين وسعيد أن المسلسل خلاكم تقروا وتسألوا.. و شوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللى احنا عاملينه.. ومع الوقت ننافس".
وكانت الحلقة 4 من مسلسل الحشاشين استمرت فى إثارتها المعتادة، وذلك بعدما انتهت إلى خروج حسن الصباح من بيت سر السلطنة وتحول شخصيته بصورة كبيرة عقب اصطدامه برفض ابنه الأكبر لواجبات أسندها له ليحبسه فى غرفة مظلمة حتى الصباح.
بدأت الحلقة الـ 4 من مسلسل الحشاشين بوصول حسن الصباح – كريم عبد العزيز – إلى مدينة عكا، وفيها قابل زيد بن سيحون – أحمد عيد وأخبره بأنه سيقابل نظام الملك – فتحي عبد الوهاب – ليرد عليه أحمد عيد بقوله : "أصبح لنا 200 تابع سيكونون حول أصفهان، وكلهم معك فى دعوتك".
الحلقة 4 من مسلسل الحشاشين استكملت أحداثها المثيرة مع طلب نظام الملك فتحى عبد الوهاب من السلطان ملك شاه انضمام كريم عبد العزيز – حسن الصباح – و أحمد عيد – زيد بن سيحون – إلى بلاط المملكة، وهو ما حصل بالفعل، وأثناء اللقاء طلب حسن الصباح من عمر الخيام تولي ولاية بأكملها تحت رعايته إلا أنه رفض فطلب بالتالى منه أن يكون فى بلاط المملكة عالماً يخدمها فى العلوم لتستفيد منه الدولة.
يعرض مسلسل الحشاشين الحلقة 5 ، بطولة النجم كريم عبد العزيز على قناة DMC الساعة 9:15 مساء ويعاد الساعة 1:45 صباحا والساعة 4:15 مساء، وعلى قناة DMC دراما الساعة 11 مساء والإعادة الساعة 6.30 صباحاً والساعة 1.30 مساء، إضافة إلى عرضه بالتزامن مع عرضه على منصة Watch it الساعة 9.15 مساء.
