هنأت عدد من كبار الفنانات المصريين بعيد الفطر المبارك، حيث كشفن عن أبرز ذكرياتهن خلال العيد، وكيف كن يقضين أيام العيد مع الأسرة خلال طفولهن.
إسعاد يونس: أحلى حاجة فى العيد ستات العيلة والعمارة متجمعين بينقشوا الكحك
هنأت النجمة القديرة إسعاد يونس، الشعب المصرى والأمة العربية والإسلامية بحلول عيد الفطر المبارك، مشيرة إلى أن أحلى ذكريات لها في العيد هو اللبس الجديد وأيضا تجمع سيدات العائلة والجيران لعجن ونقش كحك العيد.
وقالت إسعاد: "أحلى حاجة في العيد اللبس الجديد، وستات العيله والعمارة متجمعين بيعجنوا وينقشوا الكحك والصواني راحه جايه على الأفران ونسرق كام كحكة من على الصينية وناكل المكسور طبعا وهي لسه طالعه من الفرن طازة".
وأضافت إسعاد: "كمان صف العيدية والفلوس الجديدة اللي ريحتها زي العربية الفابريكة، أحلى حاجه في العيد لمتنا، كل سنة وانتم طيبين وكل سنة وأنتم بخير وأمان وسلام".
منة شلبى: أكتر حاجة بحبها فى العيد نقش الكحك وركوب العجلة
كما هنأت النجمة منة شلبي، الشعب المصري والأمة الإسلامية والعربية بحلول عيد الفطر المبارك، مشيرة إلى أن العيد بالنسبة لها يبدأ مع تكبيرات العيد وأن ذكرياتها مع العيد هو نقش وأكل الكحك وركوب العجلة.
وقالت منة: "العيد بالنسبالي بيبتدي مع تكبيرات أول يوم العيد وألاقي ماما حطالي الهدوم الجديدة على السرير وأنا ببقى محضرة جزمتي جنب السرير وبتحطلي جنبها العيدية".
وكشفت منة، عن يومها في العيد، قائلة: "كنت بحب أركب عجل جدا في العيد وأنا نص إصابات ركبي من العجل لأن أنا كنت دايما بقع من على العجل، وأكثر حاجة بحبها في العيد كمان لما بنقعد نعمل وننقش الكحك، وأول ما بيخلص واول واحده بتاكلها، عيد سعيد على مصر كلها وكل سنة وحضراتكم طيبين ومصر كلها بخير".
دينا الشربيني: "أحلى ذكرياتى فى العيد كانت مع أهلى ولمة العيلة والجيران"
كما هنأت النجمة دينا الشربيني، الشعب المصري الكبير بحلول عيد الفطر المبارك، متمنية أن يكون عيد خير على الجميع، مشيرا إلى أن أحلى ذكرياتها في العيد كانت مع أهلها ولمة العيلة والجيران في صلاة العيد.
وقالت دينا: "أحلى ذكرياتي في العيد كانت مع أهلي وإحنا وسط الجيران واللمة والعيلة والشارع كله كده فرحان إن أول يوم العيد جه، كنا بنروح لجدي وجدتي دايما أول يوم العيد، كنت ببقى حاسة إني زعلانة إن رمضان خلص عشان أنا بحب رمضان جدا بس كمان مبسوطة قوي بالعيد وأن الناس كلها نازله تصلي".
وأضافت دينا: "كنا بنعمل كحك في البيت، فاكرة شكل الصواني وفاكرة وكلنا قاعدين بننقش الكحك واللبس الجديد ده بيبقى بايت في السرير وأفضل بصه لحد ما أصحى تاني يوم عشان ألبسه".
وتابعت دينا: "بقول للمصريين كلهم كل سنة وأنتم طيبين يارب، ويارب سنة وسنين جاية كتير جميلة علينا كلنا وأحنا عايشين في أمن وأمان واطمئنان".
