وجه محمود فايز مدرب ومحلل أداء منتخب مصر في جهاز الأرجنتيني هيكتور كوبر رسالة للمدير الفني الحالي للفراعنة العميد حسام حسن بعد جلسة مغلقة عقدها الأخير مع بعض الصحفيين.
وكتب محمود فايز قائلا: "مدرب منتخب مصر كابتن حسام حسن حب يعمل جلسه (سريه) مع اخواتنا الصحفيين، جلسه (مغلقه) ومع صحفيين ومحرري اخبار وناقلي احداث..!!! ازاي طيب…!!!".
وتابع فايز: "والله يا كابتن حسام ما فيه حد يقدر يشكك ١٪ من اخلاصك ومجهودك وإحساسك الوطني، اعمل اللي عليك وان شاء الله ربنا هيكرمك، دعمنا ليك وللجهاز وللمنتخب المصري مطلق".
وواصل المدرب المساعد في عهد كوبر: "الدعم ممكن يكون بنصيحه… نقد صحي… رأي فني… وده شغل ودور مهم جداً للاعلام والصحافه في اي حته في العالم".
وختم فايز رسالته بنصيحة قائلا: "أنا جايلك من المستقبل وبقولك ان لا إعلام ولا صحافه ولا سوشيال ميديا (ولهم كل التقدير) هتقف جانبك (لا قدر الله) وقت خساره… فكل اللي عليك الشغل والتعب والإخلاص والنتيجه في الأخير بتاعت ربنا… والله الموفق والمستعان".
وأثار بعض تصريحات حسام حسن المدير الفني لمنتخب مصر الأول لكرة القدم، الجدل خلال جلسته، أمس الإثنين، مع الصحفيين المصريين باتحاد الكرة المحلي.
وكان حسام حسن قد تولّى تدريب منتخب مصر في أوائل فبراير الماضي، خلفًا للمقال البرتغالي روي فيتوريا، بعد توديع بطولة كأس أمم إفريقيا 2023 من دور الـ16 على يد الكونغو الديمقراطية.
