قال حسام حسن مهاجم سموحة، إن أحمد سامي تحدث معنا بأن مباراة الزمالك في كفة وباقي المباريات في كفة أخرى، وذلك بعد خسارتنا بخماسية أمام الزمالك من قبل، لذلك كانت مواجهة اليوم مهمة جدا بالنسبة لنا.
وأضاف حسام حسن، خلال تصريحات في برنامج رقم 10 على القناة الأولى مع الإعلامي كريم رمزي: "الزمالك اسم كبير سواء باللاعبين الأساسيين أو الاحتياط، ونتمنى التوفيق لقطبي الكرة المصرية الأهلي والزمالك في النهائي الأفريقي".
وتابع: "أنا ما مثلتش خالص.. تعرضت لنفس اللقطة اللي اتعرض ليها سامسون في مباراة الزمالك والبنك الأهلي والمفروض فيه قانون بيحميني.. وقلت للبنا أنا مش بمثل.. وأرجع لتقنية الفيديو، وأنا من منتصف الملعب كنت شايف إن كرة أحمد حمدي مش ركلة جزاء بسبب أن لاعب سموحة لمس الكرة أولا".
وعن التألق في سموحة، قال: "ممكن يكون عامل التوفيق ما كانش معايا في الأهلي ودايما اللاعب بيكون عايز يرتاح نفسيا للعب بشكل أكثر راحة، وقميص الأهلي أو الزمالك له هيبة بالتأكيد، لكن خروجي من النادي الأهلي مش عشان أثبت حاجة للناس.. أنا كده كده كويس.. لكن العامل النفسي فقط هو اللي كان مؤثر.
وتابع: "أكيد كنت هتألق مع مارسيل كولر لأنه مدرب كويس.. وموسيماني برضو مدرب كويس وأي مدرب بيقود الأهلي هيكون كويس وأنا كنت مبسوط مع كولر لكن حسيت إني مش هكون أولوية بالنسبة له ولسه عندي أفضل من كده".
وعن المفاوضات مع الزمالك، قال: "ما عنديش مشكلة ألعب لنادي الزمالك فهو نادي كبير، الفترة اللي جاية بسعى لتقديم أداء أكبر من أجل منتخب مصر ووقتها أدرس العروض المقدمة لي".
