سوسن بدر: لا أرغب فى إزالة وتغيير ملامح السنين والكبر خبرة ونضج

أكدت الفنانة سوسن بدر، أنها لا ترغب في إزالة أو تغيير ملامح السنين من وجهها وأنها سعيدة بذلك، قائلة: "أنا خلاص كنت صغيرة  وما صدقت خلصت الفترة دي ومبسوطة اوي بالمرحلة الحالية لأننا كبرنا وفهمنا وعقلنا وبقينا متقلبين الحياة والدنيا".

وأضافت سوسن بدر، خلال  لقاء عبر برنامج  "كلمة أخيرة" الذي تقدمه الاعلامية لميس الحديدي على شاشة  ON، رداً على سؤال الحديدي: "مع تقدم السن  هل ماينفعش نحب أو نتجوز؟" لترد قائلة: "مين اللي قال؟  اللي عايز يعمل حاجه يعملها مادام مش ضد العرف ولا الاخلاق ولا المجتمع أو الدين ما عيب إلا العيب".

وعن رأيها في أحكام الناس؟  أجابت قائلة: "الناس مش هتبطل كده كده..  وأنا صغيرة  كنت بخاف للغاية من المجتمع وكنت حريصة  جدا بقدر الامكان  أن أظل  محافظة على التقاليد والاعراف حتى لو مش مقتنعة بها  علشان أهلي وأبويا والمجتمع وأولادي لكن مع الوقت عرفت أن التقدم في العمر والسن حرية.. ليه كنا بنعمل كل ده؟  لا يصح إلا الصحيح محدش هيفضل طول الوقت عاجب كل الناس ولا كل الناس هتتفق عليه".

وعن أهم ما منحه لها التقدم في السن قالت: خبرة ونضج وحرية وسعادة وكل حاجة  أنا في منتهي السعادة.. حتى ملامحي بحبها طلعلي خطوط وماله قمر برضه".

ووجهت رساله للسيدات اللاتي يخشين من خطوط وتجاعيد التقدم في السن.. والانتقادات التي يوجهها بعض الرجال للسيدات قائلة: "يعني الست بتكبر لوحدها وهو مش بيكبر؟ ما كلنا بنكبر سوا والمفروض نعقل سوا وننضج سوا الفرق أن الست بتنضج من سن أصغر وأسرع من الراجل  بيكون وقتها لسه بيلعب كورة في الشارع".