تحدثت النجمة أمينة خليل عن دورها في فيلم شقو، في تصريحات خاصة لليوم السابع، الذى عرض خلال عيد الفطر الماضى، والفيلم بطولة عمرو يوسف، محمد ممدوح، دينا الشربينى، أمينة خليل، محمد جمعة، وليد فواز، عباس أبو الحسن، جميل برسوم، حنان يوسف، مع ظهور خاص للفنانة يسرا وضيف الشرف أحمد فهمى ومن تأليف وسام صبرى، ومن إخراج كريم السبكي.
وصرحت أمينة خليل قائلة: "شقو من الأدوار المحورية جدا اللى حصلت لى في الكارير بتاعى، من أول ما اتعرض عليا الدور أنا اترعبت، كنت مقسومة نصين كده، نص مرعوب، والنص التانى متحمس جدا وبيقولى إنتى قدها، فـ الاتنين اتخانقوا شوية، وفى الآخر قررت إنى لازم أشارك".
وتابعت: "اشتغلت كتير جدا على الدور قبل ما اقف قدام الكاميرا ونبدأ تصوير، وروحت دروس مع مدربة تمثيل الأستاذة جيهان الناصر، ودروس رقص مع مدرب الرقص الأستاذ ربيع، وكنت بشتغل معاه طول الوقت، علشان كان لازم نكسر كل حاجة ونبنى الشخصية من أول وجديد، لأنه مع الشغل على الشخصية مفهومى الأول كان حاجة، ومع الوقت الموضوع اختلف تماما".
وأكدت أمينة خليل قائلة: "اتفرجت على فيديوهات رقص كتير لكل الراقصات من أول تحية كارويا لـ فيفى عبده في حزمنى يا، لـ بدرا واوكسانا والناس الموجودين دلوتى، اتفرجت على كل الفيديوهات".
وأشارت "كنت محتاجة أعرف الشخصية اللى هي رقاصة في كباريه شعبى هترقص إزاى، لأن فى نفس الوقت هى بتقدم استعراض في رقصها، فهى مش بتمل من اللى هي بتعمله، هو نوع رقص معمول بشغف جدا ودلع جدا، وبحب أوى، خاصة لما حبيبها بيخش الكباريه هي بتتكلم من خلال رقصها".
وأنهت حديثها قائلة: "لدرجة لما خلصنا فيلم شقو قولنا ياريت فوتنة كان عندها مشهد رقص تانى ترقص فيه".
أمينة خليل ولميس محمد
