ينتظر عشاق الطعام والطهى فعاليات أكبر مهرجان للأكل والطبخ في مصر "Bites by the Sea" ضمن فعاليات مهرجان العلمين 2024، والمقرر انطلاقه يوم الجمعة 16 أغسطس، وسوف يضم المهرجان العديد من المفاجآت والمسابقات التي تنظمها قناة "سفرة" بالتعاون مع "كايرو بايتس"، وتقدم هدايا مميزة للجمهور.
مهرجان الأكل بالعلمين
وخلال فعاليات المهرجان سوف يتم عرض أطباق مميزة ومشهورة بعدة دول مطلة على حوض البحر المتوسط مثل لبنان، إسبانيا، المغرب، تركيا، اليونان، وإيطاليا. بالإضافة إلى تقديم أكلات مصرية شهيرة على أيدي شيفات قناة "سفرة" الفضائية، ومنهم الشيف شربيني، نجلاء الشرشابي، غادة جميل، نورا السادات، غادة التلي، نرمين هنو، توتا مراد، ساندرا مكاري، عمر إسماعيل، مروة مهني، وأميرة شنب.
الشيف الشربينى
تشمل فعاليات اليوم المنتظر أيضًا مشاركة عدد من النجوم والجمهور في مسابقات ممتعة تضفي أجواء من البهجة. وتختتم بحفل موسيقي يحييه الفنان حمزة نمرة والمطربة سعاد ماسي وفريق "مسار إجباري"، ونتعرف فى السطور التالية معلومات أكثر عن أكبر مهرجان للطبخ والأكل بالعلمين.
الشيف نرمين هنو: هعمل مجسم من البسكويت لفنار الإسكندرية
تحدثت الشيف نرمين هنو عن مشاركتها بمهرجان الأكل "Bites by the Sea" ، حيث قالت لـ : "اليوم السابع":"كلنا مبسوطين بمشاركتنا في المهرجان والحقيقة روز مارى رئيس قناة سفرة عاملة أنشطة كتير لجميع الشيفات وهنقدم مجموعة مختلفة من الأكلات المختلفة والناس هدوقها معانا وهنشرح لهم طريقة تحضيرها والسنة دى الحقيقة المهرجان مختلف عن تقديمه في القاهرة خلال الفترات الماضية".
نرمين هنو
وأشارت الشيف نرمين إلى تحضيرها لحلوى مميزة عبارة عن مجسم بسكويت سوف تقدمها خلال مشاركتها بالمهرجان مثل مجسم برجين العلمين الذى قدمته الفترة الماضية خلال تواجدها بمهرجان العلمين، حيث قالت :" فكرة تصميم برجين العلمين كانت فكرة روز مارى رئيس قناة سفرة وصممت المجسم، والحقيقة أخد وقت كتير لتحضيره، ولكن خلال مهرجان الأكل هنعمل مجسم لفنار الإسكندرية إحدى معالم السياحية لعروس البحر، بما إننا بنشارك بأطعمة خاصة ببلاد البحر المتوسط، وناوية أعمله بطول متر أو أكثر وهو مكون من بسكويت كوكيز".
وتابعت :"ناوية أقدم أكلات خاصة بدول البحر المتوسط زى من لبنان مناقيش وتركيا عيران وبقلاوه وبوريك ومن أسبانيا شوربة الطماطم وأكلات من إيطاليا والمغرب واليونان وغيرها من الدول وهيكون في مسابقات وجوائز خاصة بالجمهور، وكل شيف هيكون له فقرة عبارة عن مسابقة بيشارك فيها الجمهور والشيف اللى بيحكم بينهم واللى يكسب هياخد جائزة، مثلا ً المسابقة اللى هشارك فيها هعمل سلطة يونانى واللى يعرف يعمل أحلى سلطة هو اللى هيكسب ".
الشيف غادة التلي: كل حاجة في العلمين مبهرة وناوية أقدم بلح الشام التركي
وتحدثت الشيف غادة التلي عن مشاركتها بمهرجان الأكل بالعلمين، حيث قالت لـ" اليوم السابع":" الصراحة كنت دايماً بسمع عن مدينة العلمين وماكنتش شوفتها قبل كده وافتكرت الناس بتبالغ لكن لما روحت انبهرت بيها، حاجة تفتخرى إنها موجودة في البلد، ومناسبة لكل الإمكانيات المادية، و مبسوطة جداً أن شركة المتحدة للخدمات الإعلامية اتاحت لنا المشاركة بمهرجان العلمين سواء من خلال مشاركتنا في برنامج مع الإعلامية هبة الأباصيرى أو مشاركتنا كـ شيفات سفرة في أكبر مهرجان أكل في مصر، والجميل أن الجمهور هيشارك معانا وهيحصل على جوائز قيمة جداً زى أجهزة كهربائية والسنة دى حاسة أن المهرجان مختلف ومميز وفي تواصل مع الجمهور وفى ألطف مدينة على الساحل وهى العلمين".
غادة التلى
وعن الأطباق التي تنوى تحضيرها، قالت :"الفكرة قائمة على تحضير أطعمة مشهورة ببلاد البحر المتوسط، وأنا هعمل بلح الشام التركى وهو بيختلف عن المصرى لكن هما الاثنين حلوين جداً، والمسابقة اللى هحكم فيها هيكون فيها أكلة من تركيا واللى هيعملها أظبط هو اللى هيكسب لكن الكل كسبان معانا".
وعن الشعور المختلف بين الطهى في الاستوديو وأمام الجمهور، قالت :"في فرق بين الطهى في الاستوديو لو حسيتى بملل ممكن توقفى تصوير لكن أمام الجمهور لازم ماتخليش الجمهور يحس بملل وتفضلى جاذبة الناس طول الوقت وانا بحب اتعامل مع الجمهور على طبيعتى وإن شاء الله هيكون يوم لطيف مع الجمهور"
الشيف نجلاء الشرشابي: كل حاجة في العلمين على قد الإيد
وتحدثت نجلاء الشرشابى عن إقامة فعاليات مهرجان الأكل بمدينة العلمين لأول مرة هذا العام، حيث قالت :" بنطلع الناس على حاجات جديدة وعملنا حلقات كتير حلوة هناك ومدينة العلمين مختلفة ومميزة بجوها وناسها كل حاجة كانت مشرفة بصراحة والمدينة واسعة وحلوة وكل حاجة هناك موجودة والأسعار مناسبة للكل وفي حاجات مجانية كتير جداً، ممكن تتفسحى ببلاش، بصراحة هي معجزة، وفي أماكن كتيرة مخصصة للأطفال وأماكن للأكل بجميع الأسعار زى اللى مطبقة في كل حتة يعنى على قد الأيد".
نجلاء الشرشابى
وعن وصفات الطعام التي تنوى تقديمها خلال مشاركتها بمهرجان العلمين، قالت :"هعمل حمص الشام وهنحط إضافات جديدة وعاملين عليها مسابقة وكل واحد هيحط التاتش بتاعه واكتر حد هيعمل وصفة حلوة هياخد جائزة، وهعمل وصفة من بلد تانية من بلاد البحر المتوسط وملائمة مع الشعب المصرى وهى هتكون مفاجأة للمشاركين ".
وتابعت :" الطبخ في الاستوديو بكلم الكاميرا أو بكلم نفسى لكن قدام الجمهور إحساس تانى خالص لأن الجمهور بيتفاعل معاكى وبيتصور معاكى بتعرفى رد فعلهم في نفس الوقت، وأرائهم بدون مجاملات وده حاجة حلوة جداً المهرجان مختلف عن السنين اللى فاتت السنة دى ضحك ولعب وجد وحب يعنى مسابقات وتفاعل جمهور معانا إن شاء الله هينبسطوا ".
الشيف توتا مراد : هعمل أنا وساندرا أكبر طبق كشرى على شكل هرم
وكشفت الشيف توتا مراد، عن مفاجأتها التي تنوى تحضيرها في المهرجان حيث قالت لـ "اليوم السابع":" أنا والشيف ساندرا مكارى كنا بنعمل في رمضان اللى فات برنامج طبخ ترفيهى في تحديات وشد وجذب أكتر من اتنين بيطبخوا وقررنا السنة دى في مهرجان الأكل نعمل أكبر طبق كشرى على شكل هرم في العلمين ".
توتا وساندرا
وعن مكونات طبق الكشرى قالت :" الطبق مكون من 40 كيلو مكونات عشان نعمل حاجة مختلفة وبقالنا 10 أيام أو أسبوع وهنعمله في مهرجان يوم الجمعة، وهيكون في مسابقة بين متسابقتين حول عمل أحسن صلصة ودقة كشرى واللى هتكسب هتاخد جائزة بناءاً على تحكيمى انا وساندرا، والطبق أعتقد حجمه متر ".
منظم المهرجان: هدفنا وضع الطعام المصرى على خريطة السياحة العالمية
محمد سامى مدير الشركة المنظمة لمهرجان "Bites by the Sea، قال لـ "اليوم السابع":" الهدف هو ترويج السياحة وثقافة مصر العريقة في الأكل والهدف من إقامته في العلمين لأنها بضم الأحداث المهمة، والجديد لأول مرة بما إن مدينة العلمين أحدث مدينة على البحر المتوسط، عاملين أطعمة البحر المتوسط وبضم الأكلات المشهورة في البلاد زى التركى والمغربى والإيطالى وفى مكان مخصص للشيفات المشهورين في الشرق الأوسط وبيدوقها للجمهور".
تابع :"في مسابقات خاصة بالطهى والتذوق وطبخ الأكل أسرع وغيرها من المسابقات المتعلقة بمهارات الطهى وجوائز أجهزة كهربائية وهدايا البحر وغيرها الهدايا وأى حد حاضر ممكن يشارك حتى الأطفال مفيش شروط للمشاركة".
وأضاف :"المهرجان بقاله 11 سنة وممكن نشوفوه في أي يوم من أيام السنة، والمشاركين اشهر الشيفات زى : نجلاء الشرشابي، غادة جميل، نورا السادات، غادة التلي، نرمين هنو، توتا مراد، سندرا مكاري، عمر إسماعيل، مروة مهني، وأميرة شنب وتختتم الفعاليات بحفل موسيقي يحييه الفنان حمزة نمرة والمطربة سعاد ماسي وفريق "مسار إجباري" وممكن مشاهير بمجال الفن يشاركوا في الطهى لكن بشكل ودى".
وعن تأثير مشاركة مهرجان الأكل ضمن فعاليات مهرجان العلمين، قال :"الطبق المصرى مشهور عالمياً وبيحتل مكانة كبيرة عالمياً، لكن محتاجين نسوقه أكتر لأن أحد مميزاتنا والأكل نوعين اولاً احنا عندنا طبق واحنا على خريطة العالم في الأطباق وبنافس عالمياً وفى اول القائمة محتاجين نزوقه ونهتم بالتفاصيل اكتر عشان كده إحنا مشاركين في مهرجان العلمين لأن مشاركته هتأثر إيجابي عليه، وهيحط الأكل على خريطة السياحة العالمية ".
تم أضافة تعليقك سوف يظهر بعد المراجعة