"عاصمة المستقبل" هو الاسم الذى أطلقته المهندسة آلاء أيمن جمال، على مشروع تخرجها من كلية الفنون الجميلة جامعة حلوان، وهى عن جدارية فسيفساء للعاصمة الإدارية، فهي عبارة عن مزيج بين الحاضر والماضى ومدى فخامة التصميم المعماري والبحيرات الصناعية وناطحات السحاب الموجودة بالعاصمة والبنية التحتية المتطورة كما يشير إلى مستقبل الاستثمار، حيث تعتبر هى الوجهة الاستثمارية العالمية لمصر.
وعن تفاصيل المشروع قالت آلاء لـ اليوم السابع: "مشروع التخرج بيكون فردي كل واحد بيختار المكان اللى هو حابب يعمل عنه ويحط الجدارية بتاعته فيها، في الأول عملنا لوحة فسيفساء في القسم بتاعنا عن فنان تشكيلى وعجبت الدكتور سيد قنديل رئيس جامعة حلوان وقرر أنه هيحط اللوحة دى في حى الوزارات في العاصمة الإدارية، وبالفعل روحنا العاصمة الإدارية وقابلنا وزير التعليم العالى محمد أيمن عاشوروأشاد باللوحة بتاعتنا.
وأضافت: "أما عن لوحة الفسيفساء الخاصة بمشروع التخرج بتاعى واللى كانت بعنوان "عاصمة المستقبل"، جاتلى فكرتها لما زورت العاصمة الإدارية أول مرة وشوفت جمال التصميمات اللى مكنتش أتخيل إنها كده، كل ما حد بينطق قدامنا كلمة العاصمة بنفتكر أن هي مجرد صحراء، ولكن لما نزلت لأول مرة انبهرت بالتصميم المعماري كل حاجة بتتعمل وهتتعمل بفكر جديد وتصميمات عالمية، أنا حبيت العاصمة لما زرتها مرة واتنين وحبيت الناس تعرف عنها أكتر وحبيت أجسدها في جدارية توضح وتشرح تفاصيل العاصمة كلها وبدأت أنزل أشوف العاصمة وأصورها والتقطت صورة لكل مكان هناك وعملت بعض الاسكتشات واختارت البالته اللونيه، وركزت على فكرة تكرار الأبراج باختلاف أحجامها ليشير إلى التطوير السريع والمختلف، مشروعى كان عبارة عن فسيفساء زجاج على خشب".
وعن تفاصيل اللوحة قالت آلاء: "بدأت اختار الزجاج المشبح المستورد واختيار تشبيحات الزجاج المناسبة لاتجاه الأبراج أول حاجة كان البرج الأيقوني أعلي برج فى أفريقيا وجمعت كذا برج فى العاصمة، واستخدمت عنصر الجبل فى المشروع علشان جملة العاصمة كانت صحراء ووجود الأبراج جنب الجبل لمزج الماضي والحاضر وإن اللي حصل كان فوق خيالنا والمساحات الخضراء والبحيرة تمثل النهر الأخضر فى العاصمة وقد إيه المصريين مرتبطين بالنيل مش بس مباني وأبراج هي بتوفر بيئة سكنية متكاملة مع خدمات ووسائل نقل مريحة وحديثه ومميزة زي المونوريل ووجود البنت عنصر يدل على الحياة والتعليم والأمان".
مشروع الطالبة ألاء
مشروع العاصمة
مشروع عاصمة المستقبل
تم أضافة تعليقك سوف يظهر بعد المراجعة