شهد الرئيس عبد الفتاح السيسى، افتتاح عددًا من المشروعات القومية، فى مجالى المياه والإسكان الاجتماعى، على رأسها محطة معالجة الصرف الصحى بالجبل الأصفر بالخانكة، بجانب عدد من المدن السكنية بمنطقة بدر بإجمالى 2280 وحدة سكنية، ومدن محافظة جنوب سيناء بإجمالى 1068 وحدة سكنية، بإجمالى 3348 وحدة سكنية.
كما افتتح الرئيس مشروعى المحروسة 1 و2، بمدينة السلام، وذلك ضمن خطة تطوير العشوائيات وتوفير سكن ملائم وحياة كريمة للمواطن المصرى.
السيسي: "بندى الناس شقق بعفشها.. والله ما حد عمل كدا فى العالم غيرنا"
وقال الرئيس فى حديثه للمهندس كامل الوزير رئيس الهيئة الهندسية للقوات المسلحة بشأن تجهيزات محطات المعالجة :"وجهتكم بالدخول مع رجال الصناعة والشركات لتعظيم المكون المحلى طالما سندخل فى برامج ضخمة بمستوى عالى ومحطات معالجة بحجم كبير كى نعظم المكون المحلى، وأقول ذلك لأننا سنتوسع فى خلال الـ10 سنوات، وكى يعلم رجال الصناعة أنه هناك فرص كبيرة لعمل ومنتجات نحتاجها لخطة التنمية".
وعلق السيسي، على تطوير منطقة ترعة الطوارئ، قائلًا: "شايفين الناس اللى بتبنى بعيد عن التخطيط العمرانى للدولة يكون شكلها إزاى، فى أماكن خطرة وليس مجرد تخطيط عشوائى".
فيما رد المهندس كامل الوزير، قائلًا إنه تم إزالة كل التعديات والعشش بهذه المنطقة وباقى 2 كيلو فقط، وسيتم الانتهاء من المحور فى نهاية 2019، وباقى 15 فدانا قد يستغرق العمل بهم 6 أشهر، فيما أمره الرئيس بالعمل، قائلًا :"لا اشتغلوا وابدأوا الآن.. عارفين المحور بكباريه هيكلف كام.. 2 مليار جنيه".
كما علق الرئيس السيسي على مشهد المنطقة قبل التطوير قائلًا :"المنظر بتاع مصر.. تقريبا كل المناطق الخطرة أشبه بذلك المنظر وقد تزيد.. وقد نصل فيها بعد التطوير لـ250 أو 300 ألف وحدة سكنية وأرجوا أن ينتبه المصريون لما أقوله.. ناس بتاخد شقق بعفشها. حد فى العالم عمل كدا غيرنا؟.. لا والله ما حد عمل كدا فى العالم غيرنا..250 لـ 300 ألف أسرة يعنى لو ضربنا فى 5 يعنى مليون ونص، وبنحول حياتهم لشكل يليق بهم.. ومش هنسى أشكر البنك الاهلى ومساهماته وفى بشائر الخير وكل من تقدم وساهم فى هذا المشروع".
وتابع الرئيس كلمته: "عشان ندخل فى برنامج حقيقى غير مخطط فهذا يتطلب فلوس وأرقام لا أظن أنها معنا.. أرجو من البنك الأهلى والبنوك الأخرى المساهمة ولن أنسى مساهمة البنك المركزى ومساهماته بمليار جنيه فى مبادرة الصحة وإنشاء الله السنة القادمة ربنا يوفقنا برقم تانى وتالت، ولما قلت عاوزين للمناطق دى 100 مليار جنيه الناس كانت مستكترة المبلغ ولكن بدعم الناس والبنوك ورجال الأعمال أنجزنا ذلك".
وتابع الرئيس السيسي: "وزيرة التضامن كانت هتمسك فيا لما قلت أفرش 200 ألف وحدة، فمتوسط الوحدة 30 ألف يعنى عاوزين 6 مليارات.. والدكتورة بتقولى كفاية الشقة.. وهذا رأى سليم بس أنا باخد الطريق الصعب عشان الناس اللى هنا يبقى كلها زى بعض"، مستطردًا: "لا بد من لجنة من الإسكان والتضامن والداخلية والدفاع والمحافظات التى يقع فيها نطاق المشروع والجمعيات الأهلية ووزارة العدل عشان نعمل عقد نموذجى يتضمن التزامات حاسمة للقاطنين حتى لا يغيروا ما قمنا بتنفيذه، وإحنا عملنا 3 غرف عشان تكفى الناس كويس".
كما تحدث عن المحلات بالأدوار الأرضية، قائلًا :"أكثروا من عدد المحلات كما حدث فى بشائر الخير ووجدنا فرصة جيدة للمستثمرين الصغار ليستفيدوا من الوحدات الأرضية كى نخلق فرصة عمل للكيان الذى قمنا بتنفيذه.. ولما تجهزوه تعرضوه عليا، ويكون من خلال التضامن والجمعيات الأهلية وجهاز تنمية المشروعات ونيفين جامع تدخل معهم وتدى التمويلات وباقى الإجراءات".
الرئيس السيسي يوجه ببناء كنيسة بمدينة أهلينا 2 بمحافظة القاهرة
ووجه الرئيس بتنفيذ كنيسة فى مدينة أهلينا 2 الجديدة بمحافظة القاهرة، قائلا: "دا توجيه وأرجو الموضوع دا ميفوتناش تانى.. دا أمر علشان نحققه" وذلك خلال افتتاحه عدد من المشروعات التنموية.
السيسى: "الشغل البلدى" يتلف مستقبل أولادنا.. ومشروعاتنا ننفذها بشكل متكامل
وقال الرئيس عبد الفتاح السيسى، إن هناك تلوثات ببحيرة المنزلة تؤدى لإتلاف الحياة المائية الموجودة بها من أسماك وغيره، بالإضافة لتلوثات بحيرة التمساح التى تغير البيئة المائية
وأضاف: "لما بنعمل مشروعات بتكون متكاملة مع بعضها البعض، وليس فقط معالجة مياه وتحليتها، بل نحافظ على البيئة ونعمل شروط صحية وحقيقية وخاصة لبحيرة مثل بحيرة المنزلة".
وتابع: "بعض المسئولين مش واخدين بالهم من أهمية ما يتم عمله فى الـ 250 ألف فدان بالبحيرة.. ويقولوا عشان بنطلع سمك..تلوثون بحيرة كاملة على 250 ألف واحنا بنعمل محطة المعالجة عشان ناخد مياه الصرف بدل ما تدمر مياه البحيرة وتدمرها، وتطلع سمك لا يعلم به إلا الله..الأموال التى تنفق كى ننزل بمنسوب متر أو مترين فى مسطح مليار متر من الأرض".
وتابع : "بقول كدا عشان المحافظين ووزارة الرى والمسئولين عن الثروة السمكية والحيوانية بمصر يعرفوا أن المشروع قومى، وليس بهدف إيذاء 100 أو ألف مزارع يعملون مزارع سمكية، ولما نعمل حاجة هنعملها وهنعمل مزارع سمكية على أرقى ما يكون بتكلفة غير اقتصادية.. لكن إنما الشغل البلدى لا يكلف كثير ولكن يتلف مستقبل أولادنا وأجيال قادمة.. محطة المعالجة ستتكلف 18 مليار جنيه.. المبلغ دا منين؟ عشان نمنع تلوث بحيرة المنزلة.. بقول عشان الناس تعرف ما نعمله.. اللى بيتعمل فى مصر غير مسبوق وفيه كرم كبير من ربنا سبحانه وتعالى".
وواصل :"رسالتى عشان المحافظين فى الدقهلية وبورسعيد وإسماعيلية والمحافظين المشتركين بالبحيرة عشان يساعدوا معانا.. وقائد الجيش اللى فى نطاق الموضوع يشاركوا معانا". فيما قال المهندس كامل الوزير رئيس الهيئة الهندسية للقوات المسلحة أنه بحلول 30 يونيو 2019 سيتم الانتهاء من تطهير البحيرة ويتبقى الطريق مع محطة المعالجة.
واستطرد الرئيس :"نفسى وزارة الزراعة تجهز إحصائيات .. فيه فيلم كان نفسى أخليكم تتفرجوا عليه.. الناس بيقفوا عند البحيرة ويصطادوا زريعة السمك ويعبوها فى عربات النقل عشان يعملوها سماد.. حد يعمل فى نفسه كدا.. ياخدوا الزريعة بتاعت السمك اللى عمرها 3 شهور .. لو قعدت سنة ممكن توصل لكيلو و 800 جرام.. الناس بياخدوها فى أول 3 اشهر وتتلم وتتحمل عشان يحطوها فى الاحواض واللى بيموت يتحول لسماد..حد بيعمل فى نفسه كدا.. وحد يسألنى فين أدوات الدولة من وزارات الرى والداخلية والزراعة والأجهزة المعنية عشان تظبط!.. حد يقدر يظبط حركة 100 مليون؟.. محدش هيقدر.. قلت لكامل وزير نوقف حد على البحيرات عشان البحيرة ترجع انتاج 100 الف طن.. ساعدونى فى الموضوع والمعنيين بالأمر يهتموا".
وتابع الرئيس السيسى:" تم تطوير كورنيش بحيرة التمساح اللى كان مليان عشوائيات، وتم عمل ممشى سياحى وسوق سمك على أحدث مستوى للناس.. الناس لازم تساعد.. ومحافظ الاسماعيلية لازم يساعد حتى نحى فيه بحيرة التمساح".
السيسي يوجه 3 أسئلة لمحافظ القاهرة.. وخالد عبد العال يعجز عن الإجابة
سأل الرئيس عبدالفتاح السيسي، محافظ القاهرة اللواء خالد عبدالعال، أثناء عرضه لمشروعات المحافظة عدة أسئلة، كان أولها..تعرف حجم الأموال المتوفرة فى صندوق العشوائيات بالمحافظة؟.. تعرف دخل محافظة القاهرة كام؟.. تعرف عدد مشروعات الكبارى التى تم تنفيذها فى الأربع سنوات الماضية بالمحافظة؟، وجميع الأسئلة واجهها اللواء خالد عبد العال بلا جواب.
وخلال افتتاحه عدد من المشروعات بمجالى المياه والإسكان الاجتماعى، قال الرئيس السيسى لمحافظ القاهرة:"هسألك أساله، ومعرفش أنت هتبقى جاهز ترد ولا لا.. تعرف حجم الأموال الموجودة بصندوق العشوائيات عندك؟.. طيب هسألك سؤال تانى، دخل المحافظة كام؟"، فيما رد المحافظ قائلًا: "المحافظة يافندم، سيادتك..."، ثم صمت.
وواصل الرئيس حديثه للمحافظ: "تصدق وتؤمن بالله؟ انا عارف دخل مصر كام بالحتة.. دا شغل، ولازم تعرف كل جنيه فى محافظتك وإزاى تعظمهم وتكتره عشان نحل المشكلات.. طيب عملت كام كوبرى فى الـ 4 سنوات الماضية"، مستطردًا: "مش بقصد شيء .. أقول ذلك عشان لما تقعد مع المواطنين وتتحدث معاهم لازم تكون عارف رأسك من رجلك ومن خلال ذلك تعرف تتكلم وتكشف عما قدمته وما حجم عملك وما حققته وما يمكن عمله من خلال الدولة، وأقصى ما لديك..أنا آسف أن المثال جه فيك أنت .. أنا مش بقصدك أنت خالص .. أنا بقصد كل زمايلنا اللى بيتكلموا مع الناس.. خلوا أى حد فى مصر يتكلم معايا".
وأوضح أن المسئول يجب أن يكون لديه سياق للحديث من خلال وظيفته عما يقدمه وحجم الأموال وما سيمكن تقديمه، وهذا من ضمن مكملات الوظيفة فى ظل ظروف منطقتنا وما حدث فيها، مضيفًا: "ما حدث فى 2011 وغضب الناس أنه لم يكن لدينا سياق نتحدث من خلاله للناس عن الواقع .. 46 منطقة اتعملوا ازاى؟.. وعملنا كام ألف شقة.. دول بكام ؟.. لو ما خدناش بالنا من حالنا هيحصل تانى كدا.. ويبقى ما فعلناه خلال الـ 4 أو 5 سنوات الماضية إننا بنصلح ما حدث ولكن هتتكرر هذه المسائل مرة آخر ى..ولو معملناش كدا وشلنا الناس والأماكن المتواجدين بها ويعاد تصميمها وتعاد بالفعل ستتحول لبؤر مرة آخرى.. هو إحنا هنخلى الدايرة تلف بينا".
وفى حديثه لوزير الكهرباء، قال: "فيه محور فى مدينة نصر عند سوق السيارات تحت سلك الكهرباء.. يا وزير الكهرباء شلنا البتاع ده عشان نفتح المحور ده..لما نفتح المحور دا سيحدث إنفراجه كبيرة وهذا سيضطرنا للدخول لجزء من منطقة الهجانة غير المخططة وبها ناس، وهذا يتطلب تعويض وأماكن جيدة"، كما داعب محافظ القاهرة فى آخر حديثه، قائلًا:" بيجيلك فلوس قد إيه كل شهر؟".
تم أضافة تعليقك سوف يظهر بعد المراجعة