ربى حبيبى عايز أتعلم
إزاى أقول من غير ما اتكلم
إزاى أخللى حياتى مثال
وليك بالروح والقلب أسلم
أول حاجة تنضف قلبك
وتخليه جيد ومنير
تلقى ربك دايماً جنبك
وفى تعاليمه كل الخير
خليك منصف تبقى سعيد
والخير هيجيلك ويزيد
إرضى ربك وإنسى رضاك
مش كله هييجى على هواك
إعرض عن نفسك واتمنى
قرب الرب ده هو الجنة
حب الله ده حصن أمان
أدخل يلا بسرعة أوام
إرضى باللى ربك جابه
وما تطلبش حاجة زيادة
ما هو ربك عنده أسبابه
خللى رضاك بأمره عادة
إوعاك تنسى عيوبك أبدًا
وتركز فى عيوب الغير
فكر كده فى عيوبك دايماً
ده طريق للحب و للخير
إياك تنصح غيرك وانت
ما بتعملش باللى تقوله
أولى تنصح نفسك أنت
وتعمل بيه مش بس تقوله
حاسب نفسك قبل النوم
واعمللها كده كشف حساب
قبل يا عم ما ييجى اليوم
وتندم وتقضيها عذاب
إفرح بالقرب من الله
وإحزن لو تبعد عنه
ده أحلى طريق مرضاة الله
إسعى و قرب أكتر منه
خلى كلام الله يهديك
وينور لك أيامك
واعمل بيه الله يخليك
وخليه دايماً قدامك
مشاركة
اضف تعليقاً واقرأ تعليقات القراء
مشاركة
