وقامت الفنانة التشكيلية المصرية الدكتورة سها خليل منسقة النشاط الثقافى بين اوربينو والدول العربية بكتابة التعليق المصاحب للقصيدة والذى بينت فيه أصالة الأسرة المصرية.
شارك فى الكتاب عدد من شعراء وكتاب إيطاليا وجاء اختيار القصيدة كونها تعبر عن قدسية البيت والأسرة وتتضامن مع رسالة الكتاب الذى يتحدث عن وحدة الأسرة ومحبتها وأهمية ذلك للإنسان، وضم الكتاب عددا من لوحات فنية تمثل العصور المختلفة وتعبر عن الجو العائلى والأسرى الخالص.
الجدير بالذكر أن الشاعر محمود رضوان، صدر له ديوان "نضارة نظر" 2006 عن المجلس الأعلى للثقافة، وديوان "إيجار جديد" 2013 عن دار إبداع، وله العديد من الأمسيات بمصاحبة فرقة حواديت، وغنى له عدد من نجوم الغناء فى العالم العربى على رأسهم الفنان محمد منير، كما شارك بكلماته فى مسيرة عدد من الفرق الغنائية منها وسط البلد، وأشهر أعماله بننجرح وعم مينا وتسرق بيوت.
قصيدة"بيت" :
والله ما عايز غير بيت
فيه واحدة الصبح بتفرد ضفايرها
وعيال بتقوم من النوم تجرى عليا
من غير حتى ما تفتح عينها
والله ما عايز غير كوباية شاى بحليب الصبح
وبوسة حب ورضا بالحال
وجرايد كاتبة أخبار عال
وابتسمات الناس فى الشارع
ترجع تانى زى زمان
و"صباح فل". . فى وشك دايما
من عسكرى مهموم تعبان
نفسه يسلم خدمة ويجرى يروح بيته ينام
من كمسرى زهقان م الزحمة
من تاكسى ف شارع غرقان
والله ما عايز إلا تلاتة جنيه
تمن الدمغة وختم النسر
وكوباية شاى لموظف غلبان
والله ما عايز إلا بطاقتى يا ناس
حتى ولو من غير عنوان
والله ماعايز غير الشغل
لا كلام يعنى ولاحديت
ولا قالوا وقولنا
ولت وعجن وحواديت
ولا ذر ونم وهيصة فاضية وتخبيط
وقوم اقف وانت بتكلمنى
وضحكة غش وتظبيط
والله ما عايز حد عبيط
والله ما ناقص تنطيط
والله ما عايز بعد الشغل غير أنى أرّوح
تعبان م الحر وباطوح
وألقى حبيبة قلبى بتضحك
والقى طراوة بيت بتخدنى ترد الروح
هم الدنيا فى لحظة يروح
والقى عيالى بيجروا عليا
ويحضنوا فيا
ويخدو الشنطة يقلبوا فيها
ويخدو الحاجة الحلوة ويجروا
وبعد الضهر اقرا الجرنان
وانت يا أجمل شىء فى الدنيا
واقفة بتكوى لى القمصان
وبتبصيلى وانا تعبان
والله ما عايز غير حضنك واتغطى انام.
.jpg)
.jpg)
