محمد أحمد دويدار يكتب: رسالة إلى أحمد فؤاد نجم

ياعمنا فينك.. محتاجلك أشكيلك من حبيبتك بهية.. لا عادش طرحه ولا عاد جلابية.. من بعدك يا غالى لبست فيزون وحلت شعرها.. وحُمرِة الخجل زالت خلاص من خدها.. وشها بأه لونه مشمشى وأجدع مافيها مشى.. ولا باقى منها غير لسان قبيح زيها وعيون غطسانه من كتر حزنها وأسنان متخلعه بتاكل بعضها وضوافر بتنهش لحمها وصدر أم جف فيه اللبن، وقلب عاشق جوه الضلوع اتسجن.

يا ترى يا عم نجم بعد الغياب لسه شايف الزمن شاب ولسه شايفها شابة، ولا إن كتبت الآن كلامك راح ينقلب حبه.. هسيبك دلوقتى يا عمنا ترتاح.. أكيد عندك أياً ما كان مكانك فأفضل كتير من هنا.. على الأقل أنت عرفت مصيرك، أما إحنا مش عرفين مين ولا ليه، ولا إيه بكره راح يحصلنا.. حيث ما كنت سلام يا عمنا.