رامى زين يكتب: عم يا بتاع البطيخ

عم يا بتاع البطيخ كل موسم وإنت طيب
الصيف داخل علينا خلاص أهوه قريب
عايز بطيخ جميل ف حلاوته مالوش مثيل
أكله ف الحر على قلبى يطيب
...
عم يا بتاع البطيخ إدينى بطيخه
تكون محمله وماتكونش خفيفه
وياريت كمان يكون طعمها جنان
وماتكونش ماسخه وف طعمها سخيفه
...
عم يا بتاع البطيخ إدينى بطيخه مرمله
حمره مش قرعه وياريت تكون معسله
مش مهم تشقهالى المهم تديهالى
زى ما طلبت مش عايز أعمل مشكله
...
عم يا بتاع البطيخ كل صيف بستناك
تيجى وتجيب البطيخ معاك
ومهما تزوّد أسعارك برضه ف انتظارك
عشان بذر البطيخ فلوسى فداك
...
عم يا بتاع البطيخ رجاء واستئذان
ركز وإنت بتنقى أنا برضه غلبان
ونفسى أحلى ومن كتر ما بتجلى
برميل المخلل بقى عندى مليان