لعشاق صلاح جاهين.. بالفيديو.. أشهر 10 رباعيات لسة عايشة وسطنا

رباعيات صلاح جاهين سحر خاص أمد عمرها، وجعلها مرشدا ودليلا لكل الأجيال، فاستطاعت أن تجذب لها شرائح مختلفة من الجمهور سواء محبى شعر الفصحى أو العامية، أو حتى القارئ العادى، لأنها خواطر تناقش قضايا عميقة مكتوبة بحرفية عالية خلقت لها لغة خاصة نجحت فى إرضاء معظم الأذواق وتميزت بكلمة "عجبى" التى أعطت لها مذاقا فنيا خاصا.

بدأ صلاح جاهين كتابة رباعياته عام 1959، وكانت تنشر بشكل أسبوعى فى مجلة صباح الخير حتى عام 1962، ثم توقف 4 سنوات عن كتابتها بسبب تركه للمجلة ثم عاد مرة أخرى لكتابتها عام 1966 بعد أن عاد رئيسا لتحرير صباح الخير، وفيما يلى أشهر 10 رباعيات لجاهين لم يقتلها الوقت لما تقدمه من قضايا صالحة لكل العصور .


* مرغم عليك يا صبر مغصوب يا ليل
لا دخلتها برجليا ولا كان لى ميل
دخلت أنا ف الحياة شايلينى شيل
وبكرة حاخرج منها شايلينى شيل


* أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام

* عجبتنى كلمة من كلام الورق
النور شرق من بين حروفها وبرق
حبيت أشيلها ف قلبى قالت حرام
دا أنا كل قلب دخلت فيه اتحرق
* ليه ياحبيبتى ما بينا دايمًا سفر
ده البعد ذنب كبير لا يغتفر
ليه يا حبيبتى ما بينا دايمًا بحور
أعدى بحر آلاقى غيره اتحفر

* نظرت فوقى للنجوم وأنا ساير
رجلى عترت فى الحفر والحجاير
بقيت أقول وأنا ع التراب : يا سلام
مش بس عبرة أخدت . . لكن عباير

* مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين

* لا تجبر الإنسان ولا تحيره
يكفيه ما فيه من عقل بيحيره
اللى النهاردة بيطلبه ويشتهيه
هو اللى بكرة حيشتهى يغيره

* يا مية ندامة عالقلوب الخلا
لا محبة فيها ولا كراهة ولا
حتى يا قلبى الحزن ماعدش فيك
معلش لك يوم برضه رح تتملى

* أنا اللى بالأمر المحال اغتوى
شفت القمر نطيت لفوق فى الهوا
طلته ماطلتوش إيه أنا يهمنى
وليه ما دام بالنشوى قلبى ارتوى

* ولدى نصحتك لما صوتى اتنبح
ما تخفش من جنى و لا من شبح
وإن هب فيك عفريت قتيل اسأله
ما دافعش ليه عن نفسه يوم ما اندبح

* الضحك قال يا سم عالتكشير
أمشير و طوبة و أنا ربيعى بشير
مطرح ما بظهر بنتصر عالعدم
إن شاء لله أكون رسماية بالطباشير