ماشين فى الشوارع شايفين
وشوش دبلانة
للضحكة عطشانة
زى الصحارى مشتاقه للنهر
وشوش مليانة كراميش
زى ما تكون قرون بتعيش
زى ماتكون طالعة من القبر
باين عليها الأسى والصبر
تحلف ميت يمين
مكتوب فوق الجبين
الحزن يكسرأجدع ضهر
أنياب الهم
ومخالب الغم
بتخربش جروحنا
سكين تالمة
بتدبح فى روحنا
بتسرق الفرحة من جوا العيون
بتمص الرحيق من قلب الغصون
تخطف البسمة
من فوق خدود الزهر
الحزن مالى الوشوش تكاعيب
خطوط وشطوط
زى الحفر من آثار الدهر
الهم والغم
نار بتحرق كرات الدم
الحزن بيخلى الشهد مر
والوقت رافض يمر
دا الساعة فى القلب الحزين
بتغير الموازين
تصبح الثانية بشهر
جوا الهموم بنتوه
تجف الوجوه
تمشى دبلانة
للضحكة عطشانة
زى الصحارى مشتاقة للنهر
**
مشاركة
اضف تعليقاً واقرأ تعليقات القراء
مشاركة
