إيمان بالله أحمد تكتب: "جمهورية إحباطستان"

سكت الكلام فى حلقى وجفت حروفى فى جوفى
يا بلدى مالهم بيجننوكى ده أنا قلبى وقع من خوفى
خايفة أدور فى يوم عليكى ما ألاقيكى
خايفة نورك ينطفى والضلمة تغطيكى
شمسك عاوزة تتولد وهم بيطفوها
كل ما تيجى تشرق بيجروا ليه يخبوها
وكل أمنية حلوة لبلدى بيحرقوها
وكل خطوة لقدام يتلموا يأخروها
نفسى أشوفلك بكره.. ليه واقفة فى امبارح؟
دا احنا فى بكراكى بنحلم والعقل فيه سارح
وكنا متحدين فى التحرير وبنتصالح
هوه احنا مبنتحدش غير لأجل المصالح؟
بدل ما يزقوكى لقدام ولادك زقوكى لورا
وكسروكى بجهلهم وأنت أغلى جوهرة
وشرخوا شعب اتحد من يوم أمنحتب
ولعوا نار الفتنة وزادوا عليها الحطب
أمنا بتصرخ فينا وتقول "عريتونى"
"يا ولادى وأمام الأمم ليه كسرتونى"
هوه انتم بتدوروا على سبب للخلاف
ونسيتوا إنكم عيالى ومفيش اختلاف
وضربتم بعضكم ونسيتم إنكم
من نيلى ده رضعتم وإنى أمكم
ده كلكم عيالى وانا ليكم كلكم
يا ولادى قوموا يالله احضنوا بعضكم
حاوطوا على نيلى واحقنوا دمكم
وإن مخفتوش عليكم فخافوا على
ده أنا اللى ليكم وانتوا اللى لى