"القرش ع الأسفلت بيذلّ الرجال" قصيدة جديدة للشاعر سعيد شحاتة

فسّر لى فين المشكلة
لحظة ما أقول الحق فى الزمن الضلال
لحظة ما بنت الناس تقف
تستنى -قال- ابن الحلال
لحظة ما بيهددنى بياع الهوى
بجوع العيال

فسّر لى إيه المشكلة
والموت على رقاب العباد
والسيف فى إيد المحترم بيحزّ ويسوق الدلال
والشاعر الخاين بيتبغدد
وبيطالب حبيبته المنهكة بحبل الوصال
والقرش ع الأسفلت بيذلّ الرجال

فسّر لى إيه المشكلة
والقلب مش شايف إجابة على السؤال
والبنت رقّاصة الباليه
مش طايله بإيديها الحبال
والكدّابين دايمًا بيتحدوا الزمن
ويغيّروا وشوشهم مع كل احتمال
وبيوهبوا الراكب صفات الاكتمال
فيعيش على ضهر الركوبة مصدّق إن النار زلال
وان القمر سهل المنال
وان النجوم ع الأرض بتشد الرحال
وان السما ممكن يلملمها ف شِوال
وانه اللى هزّ الأرض واحتلّ الجبال
فيموت رهين الاحتلال

فسّر لى إيه المشكلة
لمّا اللى عاش فوق الركوبة
يموت شهيد الاختلال
والكدّابين واهمينه ببلوغ الكمال؟