محمد وديع العلاوى يكتب : آسفين يا بطل

آسف بأقولها ويقولها معايا كتير ظلموك
ظلموا قلب بالحب يدق وضمير مليان بالخير والحق
وعنين وحنين للنصر وجبين بينور مصر
وإيدين شقيانة وجفون وعيون هدتها دموع
وتنايا الوش الأسمر بتدارى هموم الدهر
آسف بنقولها كتير فى الشارع والدور
يا أبو وش جميل وسماره من قلب النيل
والنيل لو فات ع الوادى البور يصبح مزروع
وإن عدى هواه ع الحزن يروح ويعم سرور
آسف يا سادات بنقولها بقلب حزين مقهور
م القلب الأسود والإيد القاسية وزناد مأجور
م الولد الخاين وإخوانة السفلة وتمن مدفوع
ليه قتلوك؟
آسفين يا بطل يا زعيم يا حكيم يا نجم ف كون
يا بدر فى سما زرقا ووجاهة وعصاية عايقة
وشياكة وانس ووسامة نفس وشجاعة ليث
يا قمر وشمس هلوا علينا فى حالة يأس
يا بطل مقدام وغصن زتون وعبور وسلام
كانوا إيه الإخوة لما هانوك؟
كانوا ليه الإخوة بيسبوك ؟
ظلموك وصبرت .. شتموك و كبرت
وقلت يا رب وخدت قرار الحرب ورحت حاربت
ومعاك أبطال صغار وكبار وفرحة بأحلى عبور
وأولادك ضربوا الضربة الأولى وشقوا الريح
خلوا جندى اليد الطولى يقول يا فكيح
وكنت عنيد ووحيد على شط السِلم
والبحر غريق والدم السخن ع الرمل يفور
ومفيش ولا حد للإيد بيمد وصلف وغرور
وبقيت محتار فى قرار جبار محفوف بالهم
ورحت هناك للقدس فى عقر الدار
والكل إنداروادالك ضهره وقال يا فرار
وبقوة قلب مضيت على ورقة سلم فى قلب الكامب
واخترت رجال بالحب معاك لحكم الشعب
والكل يهاجم والكل يسارع ويقاطع
ومن حرب لحرب من بُعد وقُرب
ولا كلمة خير ولا صمت واختارك الرب
ومات الجسد بإيدين الحسد وسلاح مغرور
والعرض يفوت وتابوت بيعدى الشارع
والروح ويانا والقيمة العالية تعدى بحور
واعترف العالم بأولادك وعلمنا رفرف قوق
واولادك كملوا مشوارك بأمانة وحب وذوق
ولا لحظة واحدة بننساك فى كلام
آسفين .. آسفين يا سادات