بالفيديو.. مأساة أبناء المطلقات.. "ماهر": "أبويا مش بيسأل عليا وضرب أمى لما راحت تاخد منه فلوس".. "وأحتاج نقل دم كل شهر ونفسى ربنا يشفينى".. والأم: "منه لله الفقر اللى بيعمل فينا كدا"

"بخاف لاحسن ماما متلحقش تجمع فلوس علاجى وأموت زى صاحبى أصل إحنا فقراء"
هذه هى كلمات الطفل "ماهر" صاحب الـ9 أعوام، بعد أن أجبرته الخلافات الأسرية أن يصبح دون أب بالرغم من أن أباه ما زال على قيد الحياة.

وتابع ماهر يروى لـ"اليوم السابع" قصته قائلا: "أنا عندى 9 سنين وعايش مع ماما فى الوراق، وبابا سايبنى من 4 سنين وعايش فى العتبة، ومش بشوفه خالص، بالرغم إنه بيوحشنى لكنه مش بيسأل عليا، وأنا تعبان وخايف لأحسن أموت، ماما راحت تطلب منه يساعدها فى مصاريف علاجى اتخانق معاها وضربها".

وأكمل "ماهر": "عندى قصور فى الدم وبحتاج لنقل دم كل شهر فى مستشفى أبو الريش، أنا تعبت وزهقت من المرض ونفسى أخف وأجيب هدوم للعيد، إحنا محرومين من كل حاجة حتى الأكل، كمان التعب مش بيخلينى أركز وأحفظ فى المدرسة فالمدرسة بتضربنى والله نفسى ابقى شاطر واطلع مدرس".

واستطرد "ماهر": "أكتر حاجة بتخوفنى إن ماما ماتلحقنيش لما اتعب أصل إحنا فقراء ومش معاها فلوس.. نفسى أبطل أخاف والعب زى صحابى".

ومن جانبها قالت والدة ماهر: "ابنى مصاب بقصور فى الدم وهو عمره سنة ونص، وبيحتاج كل شهر نقل دم وأنا فقيرة ومطلقة ووالده مش بيرضى يساعد فى مصاريف علاجه".
وتابعت الأم فى حزن: "فى ولد مات من سن ابنى وشفت أهله بيصوتوا عليه لأنهم ملحقوش ينقلوا دم ليه عشان كدا ببقى حاطة إيدى على قلبى لأحسن ابنى يموت، وأنا بتفرج عليه.. "منه لله الفقر اللى بيعمل فينا كدا".



موضوعات متعلقة:

مأساة مطلقة بمحكمة الأسرة.. "نجلاء": الفقر جوزنى 3 مرات.. الأول عجوز والثانى تاجر مخدرات والثالث مغربى.. أكرملى أشحت قدام الجوامع بدل ما انحرف.. ومجتمعنا بيبص للمطلقات نظره "شمال"