الشحات مبروك: "مراتى باعت دهبها عشان أكون بطل".. عملت جمهورى "نفر.. نفر".. أتحدى أى لاعب شاب يعتزل 5 سنين ويرجع تانى.. اتعلمت السياسة فى 30 يونيو والإخوان قسموا مصر.. والستات يلعبوا "جمال" أجسام

أنا شبعان بطولات، واكتفيت بكل ما حققته فى حياتى سواء كان "نجاح أو فشل".. لكنى شعرت بالخمول أو بتعبير آخر حاسس إنى قاعد على كرسى متحرك.. طالما الانسان عايش لازم يبدع، خاصة أن البلد بتتحرك لقدام،ـ سبق وحققت البطولة 11 مرة، منذ عام 1987 علشان كده لما كنت فى مدريد عرض على رئيس الاتحاد اللعب ووافقت..

ايه يعنى عمرى 57 سنة؟.

أثار قرار الشحات مبروك بطل المنتخب الوطنى لكمال الأجسام المشاركة فى بطولة العالم بإسبانيا خلال الشهر المقبل كثيرًا من علامات الاستفهام، خاصة أن هذا القرار يأتى بعد بلوغه السابعة والخمسين من العمر، وفترة توقف دامت خمس سنوات.. لهذا حرص "اليوم السابع" على محاورته للتعرف على ما دار بخلده ودفعه لقرار العودة.

ما هى فرصك فى تحقيق ميدالية بالبطولة فى ظل منافسة الشباب؟

لا أعد بتحقيق ميداليات فى البطولة لكن أعد بعمل فورمة يتم تدريسها للأجيال، فالشحات مبروك يصنع المستحيل ويعيد الزمن إلى الوراء.. أتحدى أى شاب فى العشرينيات يعتزل 5 سنين وبعدين يرجع تانى.

ألا تعتبر مشاركتك نوعًا من الأنانية لأنك أخذت مكان لاعب شاب يريد المشاركة؟

الرياضة مفيهاش أنانية.. الأنانية تكون فى وظيفة أو حزب سياسى أو لو أنا رئيس جمهورية قاعد ومش عايز يمشى.. اللى أنا بعمله قدوة للشباب الصغير اللى عايز يكون بطلا فى المستقبل.. عشان ياخدوا الشحات مبروك مثلا للطموح والتحدى للطبيعة.. نفسى العمر يكون رقم فى البطاقة الشخصية وليس مقياسا للعطاء والمجهود.

متى قررت المشاركة فى بطولة العالم؟

منذ 10 أشهر وأنا أتدرب للمشاركة فى هذه البطولة.. الموضوع لم يكن سهلا، تدريبات شاقة ونظام غذائى قاس، مكنتش شايل العضلات فى الدولاب.. زوجتى كانت متخوفة ونصحتنى بالاشتراك فى بطولة الأساتذة.. لكنى أصريت على موقفى وأنا الآن مستعد.

من هو الذى علمك ممارسة اللعبة؟

أنا طول عمرى لوحدى.. بدأت وعندى 16 سنة لكن الكابتن سعيد دعموش من البحيرة هو صاحب الفضل عليا ده "الكُتاب" بتاعى.. كنت كل يوم جمعة أروحله وأتمرن معاه غير كدة أنا كنت مدرب نفسى.

كم تحصل على راتب من الاتحاد المصرى لكمال الأجسام؟

بلاش نتكلم فى الموضع ده.. الاتحاد يدعمنى ماديا بشكل جيد.. لكنى لو أخذت 20 ألف جنيه فى الشهر مش هيكفونى.

ألا تشعر بشىء من الظلم بالمقارنة مع لاعبى كرة القدم من حيث الدخل المادى؟

مقارنة أى لعبة فردية مع كرة القدم هى مقارنة ظالمة لأنها اللعبة الشعبية الأولى فى العالم كله.. وهذا ليس معناه أننا على الرف بالعكس كمال الأجسام موجود ما أقصده أن لكل واحد مجاله ورزقه.

هل تتذكر أول مكافأة حصلت عليها من ممارسة اللعبة؟

25 جنيها عندما حققت المركز التاسع فى بطولة العالم بالفلبين عام 1980، وكان الدولار يومها يساوى 70 قرشا.

وأنت تشارك فى بطولة العالم فى عمر 57 سنة، هل يختلف شعورك عن أول مرة شاركت فيها ببطولة العالم؟

أولا أنا شاركت فى بطولة العالم 1980 فى الفلبين وعمرى 21 سنة وحققت المركز التاسع، مكنش فيه بطولات ناشئين وقتها، بعد البطولة عملوا بطولة للناشئين عشان خاطرى أنا.. لكن بالنسبة للإحساس مختلف جدا أنا حاسس بقلق لم أشعر به فى أول بطولة، لأنى أواجه المستحيل.

كيف دخلت عالم السينما؟

البداية كانت مع الأستاذ إبراهيم الموجى حيث كان يقوم بعمل فيلم تسجيلى عنى بمدينة دسوق مسقط رأسى بعد حصولى على بطولة العالم 1987 بمدريد، ولما شافنى رشحنى للتمثيل، قلتله: "أنا مش عايز أطلع لابس فانلة مخططة بالعرض وأضرب".. وعملت أول أفلامى المرشد عام 1989.

هل أنت راض عن مشوارك فى السينما؟

ليس كل ما قدمته يعجبنى "المرشد، وأمريكا شيكا بيكا، ولهيب الانتقام، والغجر" راض عنهم فنيًا.

البعض يقول إن أفلامك كلها من سينما المقاولات فما رأيك؟

أفلام المقاولات بتاعتى أحسن من أفلام اليومين دول.

لماذا لم تكمل مشوارك فى السينما؟

السينما بالنسبة لى رزق اللى عايزنى يجينى أنا مبروحش لحد.. المهم يكون الدور مناسب ليا.. كمان أنا شاركت فى مسلسلات الركين والشوارع الخلفية وضيف شرف فى مسلسل الكبير أوى.

ما هى علاقتك بأهل الفن خاصة من تعاملت معهم فى الأفلام التى شاركت بها؟

علاقتى بأهل الفن محدودة، ومفيش علاقات لا برجالة ولا ستات.. ومعنديش مساحة ليلية لاستمرار هذه العلاقة.. لأنا وضعت حد للموضوع ده عشان أسرتى عندى هى كل شىء

ما هو الموقف الذى لا تستطيع نسيانه فى مشوارك مع السينما؟

فى فيلم "أمريكا شيكا بيكا" كان فيه مشهد لكل واحد من أبطال الفيلم بيحكى فيه حاجة من حياته بصوت عالى، الكلام اللى مكتوب فى السيناريو مكنش عاجبنى حسيت إنه خفيف، ساعتها رحت للمخرج الاستاذ خيرى بشارة وطلبت منه يسيبنى أتكلم براحتى، فى الأول اعترض لكن لما قلتله إنى هحكى قصتى مع أبويا وافق، وفعلا حكيت القصة وبكيت بس مكملتش لأنى مش بحب أبكى قدام حد عشان كدة عدت المشهد تانى وحبست دموعى فى عنيا.

ما هو رأيك فى ممارسة السيدات لكمال الاجسام ولماذا لا توجد فى مصر؟

الستات تمارس أى رياضة إلا كمال الأجسام مش بتاعتهم، ممكن يلعبوا جيم، رفع أثقال، سباحة لكن كمال الأجسام لأ.. الستات يلعبوا "جمال" أجسام لأن لعبتنا دى ضد الأنوثة.. وأقول لكل ست العضلات مش شغلتك.

ماذا عن حياتك الشخصية؟

تزوجت زواجا تقليديا من غير حب.. كان عمرى وقتها 17 سنة "عيل" يعنى، هى كانت أخت واحد صاحبى بيتمرن معايا فى الجيم، وزوجتى باعت دهبها عشان أكمل وأشارك فى احدى البطولات وأكون بطل.. ولدى ابنتين متزوجتين "مروة وماهيتاب" وولد اسمه محمد يدرس فى معهد الفنون المسرحية عشان بيحب التمثيل.. وحفيدتان الكبرى 10 سنوات والصغرى فى عامها الثانى.

لماذا لم يمارس ابنك نفس طريقك ويكون عندنا الشحات مبروك آخر؟

أنا أرفض الاستنساخ بجميع أشكاله.. هو بيحب التمثيل خلاص يشتغل فيه.. ومقولة ابن الوز عوام تنطبق على الوز بس.

ما رأى أولادك فى أعمالك السينمائية؟

فيه أفلام مش بيحبوها.

مثل؟

علقة موت
ما رأيك فى قضية المنشطات والقرار الأخير للاتحاد بإجراء التحاليل قبل السفر للبطولة؟
أنا مع هذا القرار.. كنا بنسافر قبل كدة من غير تحليل وبعدين تنسحب منا الميداليات هناك.. طبعا القرار ده لازم يلاقى معارضه.. والكلام على إنه جاء متأخر كلام فاضى.. المهم أنه بقى موجود مش أحسن من عدمه؟!.

ما رأيك فى تناول بعض لاعبى كمال الاجسام المنشطات ؟

كلهم بياخدوا منشطات مش بعضهم بس نحلل ونشوف واللى يطلع عينته سلبيه هو اللى يسافر.

هل سبق وظهرت عينتك إيجابية قبل أى بطولة؟

مش كدة بالضبط.. فى بطولة 1986، حيث كنت آخذ نوع من المكملات الغذائية وعندما سألت عنه المدير الفنى للمنتخب قبل السفر قال لى إنه ليس على لائحة المنشطات الخاصة بالاتحاد الدولى، وعندما ذهبت للبطولة علمت أنه ضمن اللائحة، فقمت باستبدال عينتى مع عينة زميل لى فى المنتخب، وبالفعل "عدّت" على المشرفين فى البطولة لكنى اعترفت لرئيس لجنة التحكيم وقتها ولم أشارك بالبطولة خوفا من الايقاف لمدة عامين، وهذه الحكاية موجودة ضمن سجلات الاتحاد الدولى، وكانت هذه هى المرة الأولى والأخيرة لى مع المنشطات.

ما هو مؤهلك الدراسى؟

متوسط.
أنا حاصل على شهادة محو أمية بعد ما بقيت بطل وبعدها ذاكرت منازل.. والشهادة عندى مستندات وبس.. ربنا هو اللى علمنى مش القراءة والكتابة والشهادات.

هل حرمك مؤهلك الدراسى من تدريب المنتخب وفقًا لتصريح عصمت صادق مدرب المنتخب؟

التصريح ده قاله عصمت لأننا اختلفنا وكل واحد قال كلمة عن التانى وقتها.. لكن أنا توليت تدريب المنتخب بالفعل.. والشهادة محرمتنيش من حاجة.

هل تفكر فى الترشح لرئاسة الاتحاد؟ أو مجلس الشعب؟

لا.. لو كنت رئيس اتحاد هفشل بعد ساعة واحدة بس.. مش حتتى.. دى موهبة ومش موجودة عندى.. زيها زى مجلس الشعب.. أنا مليش فى الإدارة.

ماذا لو فشلت فى البطولة؟

أنا قيمت نفسى ونجحت خلاص.

البعض يقول أن بطولة العالم ليس لها أهمية مثل مستر أولمبيا؟

والله؟!!.. يعنى أغانى المهرجانات هى اللى ليها قيمة!!.. بطولة العالم مؤهلة لمستر أولمبيا.. اللى هى بتشترط أنك تكون متفرغ بس لكمال الأجسام.

هل سبق وطُلب منك التجنيس للعب باسم دولة أخرى؟

لأ محصلش.. ولو كان حصل مش هوافق.

هل شعرت مرة بالحزن لأن كمال الأجسام غير مدرجة ضمن الألعاب الأوليمبية؟

لأ.. وعمرها ما هتكون.. لأن الأولمبياد محتاجة رقم ملموس بيتحقق وده مش حاصل فى كمال الأجسام.. احنا لعبة استعراضية.

الناس بتضرب بك المثل فى الشجاعة والقوة قائلين "أنت فاكر نفسك الشحات مبروك ؟" بتفرحك ؟

لا طبعا أنا مش فتوة وشخصية الشحات مبروك قوية فى الأفلام السينمائية فقط .

ما رأيك فى الأحداث التى شهدتها مصر الأعوام الماضية؟

25 يناير كانت ثورة "مش فاهمة" بس علمتنى السياسة واللى حركها كانوا ناس ليهم أهداف خاصة.. دلوقتى إحنا أخدنا حلوها وسبنا مرها.. أما 30 يونيو هى ثورة حزب الكنبة، ردينا بيها على شباب 25 يناير زى أحمد دومه اللى بيقولو علينا عواجيز.

والإخوان المسلمون؟

الإخوان المسلمون جملة لازم تتحاكم شرعيًا، ولابد إن الأزهر يصدر فتوى بحرق "لوجو" الإخوان، لأن الجماعة دى بتقسم المسلمين نصفين.

أنت بطل عالم من عصر مبارك ومع ذلك لم يقابلك رئيس جمهورية بعد تحقيق أى بطولة؟

مقابلة الرؤساء موضوع مش مهم عندى.. نحن نمارس الرياضة من أجل الرياضة بعيدا عن مقابلة الرؤساء ولو إحنا مثقفين فى مصر مكنش يبقى أملنا فى الحياة إن احنا نقابل الريس.. وبعدين أنا عملت جمهورى "نفر نفر" مقابة المسئولين مش هتزودنى ولا تنقصنى.

ما هى نصيحتك للشباب؟

كل واحد يعمل الحاجة اللى بيحبها، ومش لازم يلوم على الظروف، ويسعى ويشوف شغله كويس، وعلى فكرة أنا عمرى ما عملت حوار صحفى قبل أى بطولة المرة دى محتاج أحنن قلوب الناس عليا.