بالفيديو.. "اليوم السابع" ينفرد بأول حوار مع أسرة الطالب إسلام ضحية عنف أستاذه بمدرسة شهداء بورسعيد فى السيدة زينب.. الأم: مات على إيد مدرس ملتحى علشان ما حفظ آية.. والأب: 12 سنة شقا ضاعت بضربة عصاية

- والدة إسلام: "6 أيام وابنى بيتعذب وعايزين فى المستشفى ياخدوا اللى حيلتنا"

- والد الطفل: "دى مش أول جريمة يقوم بها المدرس وليد ضد الطلاب"

- العم: "مش هنقبل بأى نهاية للمدرس غير الموت"

- الجدة: "أهل إسلام فى سوهاج مش هيناموا إلا لو حقنا رجع والمدرس اتعدم"

انفرد "اليوم السابع" بأول حوار مع أسرة إسلام شريف، الطالب بالصف الخامس الابتدائى الذى راح ضحية عنف أستاذه "وليد" بمدرسة شهداء بورسعيد، بمنطقة السيدة زينب.

أم شريف جدة الطالب إسلام

وسردت شيماء شعبان والدة إسلام لـ"اليوم السابع" تفاصيل حادث مقتله على يد "وليد" مدرس اللغة العربية والتربية الدينية، والذى وصفه معظم التلاميذ زملاء "إسلام" بـ"البعبع".

جدة الطالب وحوار مع محررة اليوم السابع جهاد الدينارى

وقالت الأم "ابنى مات علشان ماحفظش آية فى درس الدين على إيد مدرس ملتحى المفروض إنه يعرف دينه كويس، لكنه عاقب الطفل اللى قد ولاده بتذنيبه ساعتين فى الشمس ولما الولد اشتكى وقال له مش قادر ونزّل إيده من التعب ضربه بعنف وبشكل مافيهوش رحمة، ماسبش حتة فى جسمه إلا وعصايته طالتها، وكانت الضربة على رأسه هى الضربة القاضية اللى ابنى اغمى عليه بسببها".

جدة الطالب تتوعد بالانتقام فى حال ضياع حقه

وأضافت الأم "وطبعا المدرسين طبخوا الموضوع وخدوا الولد المستشفى اللى كملت سلسلة الإهمال من خلال الممرضين والدكاترة اللى كانوا بييجوا يبصوا عليه كل ما نزعق ونطالبهم بالكشف عليه.. 6 أيام وابنى بيتعذب وهما كل اللى عايزينه أنهم يمصوا دمنا وياخدوا كل اللى حليتنا، 25 ألف جنيه جمعناهم من الأهل والأقارب بالعافية على أمل إن ابنى يرجع تانى، لكنى دلوقتى خسرت كل حاجة حتى حقى خسرته والحكومة خرجته على ذمة التحقيق بكفالة 500 جنيه ثمن روح طفل فى مدرسة حكومى".

دموع وصرخات جدته وهى تسرد تفاصيل الحادث

الأب: دى مش أول جريمة يقوم بها المدرس ضد الطلاب

بينما شريف جمال والد الطالب اختار أن يصمت قليلا خوفا من أن تعجز الكلمات على وصف نار فراق ابنه وضياع حقه بسبب الإهمال والاستهتار، لكن بعض الأقاويل التى ترددت عن إجراء ابنه عملية جراحية بالمخ والتى كانت السبب فى الإغماء عليه والدخول فى غيبوبة كانت دافعا لينطلق فى الصرخات والكلمات موضحا تفاصيل الحادث.

والدة إسلام شيماء شعبان" وحوار مع جهاد الدينارى محررة اليوم السابع

وقال الأب: "بيقولوا ابنى كان عامل عملية فى مخه، وشوية يقولوا إنه كان عنده عيب خلقى فى المخ وهو ده السبب إنه يدخل غيبوبة ويموت، لكن الحقيقة إن ابنى كان زى الفل وشاطر فى مدرسته وطفل أى حد يتمنى يكون ابنه، والمدرسين هما اللى بيطلعوا الإشاعات دى علشان يحموا المدرس اللى كل أولياء الأمور بتشتكى منه واللى ديه مش أول جريمة يقوم بها ضد الطلاب".

والدة الطالب ابنى كل ذنبه أنه معملش الواجب

وتابع الأب: "قبل كده ضرب ولد وودوه المستشفى وبيضرب البنات وبيشدها من شعرها ويرفعها من أذنها كنوع من العقاب، وفى كل مرة الأهالى يسامحوه ويتنازلوا عن حقهم وفضلنا ساكتين عن الحق زى الشيطان لغاية ما ابنى مات على إيد مجرم بيدعى أنه متدين ومربى ذقنه على الفاضى، 12 سنة شقيان على البكرى إسلام راحوا بضربة من عصاية ماتعرفش الرحمة ولا تقدر النار اللى جوانا".

لحظات صعبة تمر بها كلما تذكرت مواقفها مع إسلام

عم "إسلام": "المعلمون بالمدارس الحكومية يعتبروننا عبيدا"

فى حين تداخل أحمد شعبان عم إسلام فى الحديث واصفًا مدى الإهانة التى يتعرض لها أبناء منطقة "مساكن زينهم" بالسيدة زينب فى المدارس الحكومية من قِبَل المدرسين الذين يعتبرون الطلبة عبيدًا ويؤدبونهم بأبشع الطرق والوسائل حسب قوله.

والد إسلام يعانى من إغماءات متكررة

وأضاف عم إسلام: "ويرجعوا يقولوا أبناء المناطق الشعبية بيكرهوا التعليم ليه وبيسيبوه، إحنا بقى نقولكوا بنتضرب وبنتهان جوة المدارس من أول الفراش والمدرسين لغاية المديرين اللى بيعتبرونا عبيد عندهم وبيأدبونا بأبشع الطرق، المد، والعَبْط، والقرص، وشد الشعر، وكأن هى دى الطريقة اللى هيجبرونا بيها على الدراسة، وفى الآخر يموت طفل برىء كل غلطته فى حياته إنه ماحفظش الآية اللى كانت المفروض واجب عليه، طب هو ماعملش الواجب ومات، المدرس بقى اللى ماقمش بالواجب تجاهه كمربى ومعلم إيه نهايته غير الموت اللى مش هانقبل بأقل منه؟".

شريف جمال والد الطالب فى حديثه لـ اليوم السابع

جدة "إسلام": لو الحكومة ماخدتش حقه هناخده بالذوق أو بالعافية

أما دموع جدته وصرخاتها وتوعدها بالانتقام فى حال ضياع حق حفيدها كانت المسيطرة على المشهد، قالت: "أنا بقول أهو علشان أكون عملت اللى عليا لو حفيدى الحكومة ماخدتش حقه من المدرس الشيطان اللى قتله والمستشفى اللى أهملته، واللى قالت لنا إنه مات من يوم الجمعة ورجعوا قالوا لسه فيه الروح علشان بس العداد يعد ويسحبوا فلوس على حساب أعصابنا، إحنا بقى هناخد حقنا بالذوق أو بالعافية ومش هنسيب دم ولدنا".

أقارب إسلام ينتظرون جثته ليودعونه للمرة الأخيرة

وتابعت الجدة: "وأهله فى سوهاج مش هيناموا ولا هتقوم لهم قومة إلا لو حقنا رجع لنا والمدرس ده اتعدم واتحرم أهله منه زى ما حرمونا من إسلام وحرقوا قلبنا عليه، حتى العيال أصحابه فى المدرسة كانوا عايزين يكسروا المدرسة وقرروا مايروحوش الإ لما يجيبوا حقه، وكلنا مستنين رد فعل الحكومة وتطبيق عدل الله على الأرض".

صرخات وتأوهات لعمات وخالات الطالب

موضوعات متعلقة..

أسرة الطالب ضحية مدرس السيدة: ابننا مات علشان معملش الواجب


التربية والتعليم: وقف المعلم المتسبب فى وفاة طالب بالسيدة زينب عن العمل


وفاة تلميذ إثر تعدى معلم عليه بالضرب داخل مدرسته بالسيدة زينب