محمد وهيثم.."اثنين فى واحد".. من التبديل فى الامتحانات إلى "توينز كارتون"

تجربة أشبه بتلك التى ظهرت فى فيلم "ذا بريستيج"، لكريستوفر نولان، توأم يعيشان كشخص واحد، يحصلان على نفس التعليم، ثم يدخلان نفس الجامعة، يعملان فى نفس المهنة، فى بعض الأحيان تستدعى الظروف فيحضر أحدهم مكان الآخر فى امتحان أو فى مقابلة عمل، يحولان كل حياتهما إلى قصص أعمال ورسومات تحكى تفاصيل حياة "اتنين فى واحد".


محمد وهيثم رأفت توأم 28 عاما، حكاياتهما تبدأ حول تورتة يتعاركان على من يطفئ شمعها أولا، وتستمر فى الدراسة وتخصص دقيق ثم الدخول لعالم الفنون والرسم ومشروعهما "توينز كارتون".
داخل مكتبهما الصغير يقفان أمام رسمة تنتظر لمساتهما الأخيرة، كل منهم يعرف دوره جيدا ويتفاهمان حول كل شىء بنظرة واحدة، يقول محمد: نعيش وكأننا بنى آدم واحد، وده ظاهر فى رسوماتنا اللى بتحكى حكاياتنا وحياتنا طول الوقت.


ويكمل هيثم: قابلتنا مواقف كثيرة فى مشوار حياتنا فمثلا فى أحد امتحانات الشفوى قررت أدخل مكانه لأننى الأشطر، ووقت كان لدى لقاءات عمل ويحدث أى ظرف كان توأمى يعوض مكانى، وببساطة ماكنش أى حد بيحس بفرق بينا.


ويتابع: من طفولتنا ظهر حبنا للرسم، ودعمت الأسرة هذا الحب، وفى المرحلة الثانوية قررنا دخول فنون جميلة تخصص كارتون، وبعد التخرج بدأنا مشروعًا مشتركًا وأسميناه "توينز".


يعود محمد ليتابع: أصحابنا بدأوا يطالبونا بأن نحول نفسنا لشخصيات كارتون، لكننا شعرنا أننا بنبدع أكثر بالرسم، بس فى مرحلة قريبة ممكن نتحول لكارتون، ودلوقتى بدأنا نطلع بره مصر ونعمل معارض فى الأردن.


نفس الأحلام ونفس الأفكار وحتى نفس الشكل، كوكتيل يجتمع فى حياة محمد وهيثم التى تشبه أفلام الخيال العلمى، والذى يعترف الاثنان بذلك: ساعات بنحس أن حياتنا قريبة للأفلام، فى توائم كتيرة متشابهة، ولكن إن حياتهم تكون واحدة فى كل حاجة تقريبا ماعدا البنت اللى كل واحد فينا بيحبها ده فعلا اللى بنحسه غريب.


ويشير محمد: لنا أمنية وبنحاول نحققها وهى أن نبنى ماركة كارتون عالمية تكون طالعة من مصر وبشباب مصريون، وفعلا إحنا شغالين على ده.

موضوعات متعلقة :

- بالصور.. 3 توائم يتزوجن فى اليوم نفسه ويرتدين نفس فستان الزفاف