"بيفهم عنى" قصيدة لـلشاعر " أشرف الشافعى"

الولد الواقف ورا سور بلكونة روحي ..
يشاور على بكره
سهّانى وبقى راجل !
قلتله ح اخطف مشوار للغربة صُغيّر ..
وراجعلك تانى ..
اياك تتشاقى
لكن ما استناش ..
وبسرعة مَدْ ايديه ع الأُكرة ..
وبَصْ على الدنيا
كان عايز يسبقنى !
كان عايز يثبتلي انها مش فارقة معاه
ساعات ..
لما كنت باهزر ويَّاه ..
وازغُرله
كان يضحك ويقول : مش خايف !
جايز كان نفسه يعملي مفاجأة ويكبر
أو كان نفسه أصغرله
الولد اللى الدنيا حَنّت مرة عليا ..
ف أوكازيون الفرحة ..
و اديتهولي هدية
بقى أطول مني
طب والله الواد دا ببيفهم عنيْ !
ماهو لما يحسسني وانا معاه ..
انى ماعشتش سني
يبقى بيفهم عنيْ
واما بتتكعبل روحى ف خوفها ..
والاقيه بيُحضنيْ
يبقى بيفهم عني
واما يقوللي : يابابا اتطمن
الحزن برغم هجومه ..
على قلوب الناس ف بلدنا
ما عرفش يوقّع بين الحلم وبينهم
يبقى ازاي ما اخجلش ..
واما أحس ان حاجات اتقالت وِسْط كلامه ..
مع انه ماقالش !
يبقى ما ازاى ما اخجلش ؟!
واما الاقيه فاجأة وقبل ما أسرح ..
بيغير مود الغربة ..
لقعدة عيلة بحبة ألش
دا نا أبقى حمار
لو ماعرفتش أفرح ..
واهزم كل الوجع اللى قاتلني
ارجوك يامحمد ..
ارجوك
حسسنى انك دايماً ..
فاهم عنى !
أرجوك !

موضوعات متعلقة..

"الآثار"توافق على ترميم قبة فاطمة خاتون ومئذنة الحاكم بأمرالله وبوابة النصر