ساترانا هدومنا اللى لبسناهم بالمقلوب
ساترانا قلوب بتحبّ الربّ
دعاوي الأمّ وطيبة الأب
غناوى الصبّ المتغرّب
روح المسكين لمّا تغرّب
إحساس الدنيا المتهرّب من تحت مداس
ساترانا دعاوى الناس للناس من شر الناس
ساترانا الكلمة المعسولة من الموت بعيون أبو قلب نحاس
وساترنا الحلم المتربّع فى زوايا الراس
الستر أساس بيت المستور
الزيت والفاكهة وسلك النور
كارنيه العفّه أمام البيه
وحصانه ف دهاليز المأمور
ساترانا الضحكة المتسامحة
وخيول الأحلام الرامحه
والطيبة اللة ف أوّل لمحة
والقمحة اللى فى غيطنا المبدور
ساترانا الدنيا ومستوره
ماشيه معانا بسرّ "الفاتحة"
وببركة بسملة السورة
ساترنا الدنيا بدون مكياج
وبدون مونتاج وبدون إخراج
وبدون ما نوطّى لسنيوره
ساترانا من العين تخميسه
من قلم اتحطّ ف لبّيسه
من ضرس مالوش ولا تلبيسه
من عين مذلوله ومكسوره
ساترانا من الريح والمراجيح كام حيطه صفيح
وخشب "سنابيك" مالهاش تصاريح
وفلايك وقت الموت تفاريح
وكلام يسطل ومثيله قبيح
وكفايه القلب نضيف وخفيف
والوش سميح ولساننا فصيح
وآهى ماشيه وعال
مستوره يا خال
ما يهمّش لو كلنا بتنجان أو نمنا تقال
لو نمنا تلاته في ركن الدار أو كنّا كورال
الدنيا تمام والحال يلطش
والعيشه حلال
بس ما تمشيش ويّانا شمال
ساترانا من الأوجاع رقوْه وقلب مناوِب
اسم الله عليك يابن اسمها إيه
والواحد يقعد يتّاوب
والجسم بفضله بيتجاوب ويلفّ الدور
من عين وف عين والربّ يعين ويقوم منتور
تبدأ أحلامنا بخرية كلب ونختمها بمنقد وبخور
الستر أساس بيت المستور
الزيت والفاكهه وسلك النور
ساترانا هدومنا من النسانيس
من دقن المعزه وقرن التيس
ومن المتاعيس ومن الأنجاس
ساترانا دعاوي الناس للناس من شر الناس
موضوعات متعلقة..
تنفيذ فستان مستلهم من أعمال الفنان أشرف رضا
تم أضافة تعليقك سوف يظهر بعد المراجعة