بالفيديو..قصة مجندة شاركت بحرب67..أمل:"تطوعت لإسعاف المصابين فى سن الـ16"

التقت كاميرا “فيديو7 قناة اليوم السابع المصورة” السيدة أمل وحيد، الحاصلة على ماجستير فى علوم البيئة ودكتوراه فى التربية والإعلام البيئى والتى تطوعت وهى فى سن صغيرة بالهلال الأحمر لمساعدة المرضى فى إسعاف المصابين من المواطنين والجنود بمدينة الإسماعيلية.


وتروى ذكرياتها قائلة:” أنا أصلا مصرية وهفضل مصرية لغاية لما يدفنونى لكن عشان درست فى اليونان قعدت هناك فترة طويلة لكن كنت بتردد على مصر كل كام شهر مقدرش ماشوفش النيل ده حياتى مصر هى حياتى “.

وأضافت:” كنت مجندة فى حرب 67 وفى حرب أكتوبر وشلت سلاح فى حرب 67 فى الإسماعيلية وكنت من أكبر المتطوعين فى الهلال الأحمر أبويا كان فدائى وكان بيحارب الإنجليز والملك فاروق وكل الأحزاب اللى كانت ضد مصر فأنا نشأت فى أسرة وطنية ووالدى علمنى يعنى إيه الوطنية فعشت طفولة جميلة رغم إنها كانت فقيرة فى سنة 1967 كنت فى ثانوية عامة أول ماطلبوا متطوعين فى الهلال الأحمر كنت أول واحدة اطوعت واتعلمت التمريض وإزاى أنقذ المصابين فى الشوارع والحرب و ده جعلنى أحب التمريض ورغم تحضيرى للماجستير إلا إنى اشتغلت ممرضة فى اليونان وكنت ناجحة جداً وكان أكبر جراحين فى اليونان بيضربوا لى تعظيم سلام”.

وتابعت: فى حر ب أكتوبر كنت بشتغل فى مديرية الشئون الاجتماعية فى الغربية عملنا معسكر عمليات تابع للهلال الأحمر وكنا بنعلم الناس إزاى يتصرفوا فى وقت الغارات وساهمنا فى حاجات كتيرة جدا أهمها حادثة مدرسة بحر البقر وقدرنا نسعف عدد كبير من المصابين”.

وأنهت حديثها قائلة:” لازم الإنسان يحب بلده اللى خيرها عليها ويعرف إن العالم أصبح واحد ولازم العالم يتغير ويكون إنسانى ونبطل حروب”.